काठमाडौं । लुम्बिनी लायन्सले आउँदो नेपाल प्रिमियर लिगको लागि बार्बाडियन फास्ट बलर रामोन सिमण्ड्सलाई टिममा ल्याएको छ । सिमण्ड्स लुम्बिनी लायन्सले हस्ताक्षर गरेको चौँथो विदेशी खेलाडी हुन् ।
बायाँ हाते पेसरको रुपमा सिमण्ड्सले २० वर्षको उमेरमा नै वेस्ट इन्डिज क्रिकेटमा आफ्नो पहिचान बनाइसकेका छन् । विशेषगरी उनले आईसीसी यू–१९ क्रिकेट विश्वकपमा वेस्ट इन्डिज यू–१९ टिमका लागि उत्कृष्ट प्रदर्शन देखाएका थिए ।
दबाबको स्थितिमा पनि उत्कृष्ट बलिङ गर्ने सक्षमता र आफ्नो धारिलो बलिङले टप अर्डर ब्याट्सम्यानलाई पनि चुनौती दिन सक्ने क्षमताले उनी लुम्बिनीका लागि महत्वपूर्ण खेलाडी हुनेछन् ।
सिमण्ड्सले नेपाल प्रिमियर लिगको पहिलो सिजनमा लुम्बिनी लायन्सको हिस्सा बन्न पाउनु आफ्नो करियरको एक रोमाञ्चक अध्याय भएको बताए । उनले नेपालीहरुको क्रिकेटप्रतिको उत्साहको बारेमा धेरै सुनेको र अब मैदानमा नै त्यो उर्जा हेर्न आतुर रहेको बताए ।
लुम्बिनी लायन्सका अध्यक्ष ईश्वर जिसीले सिमण्ड्सको आगमनले उत्साहित भएको बताए । उनले सिमण्ड्सको बलिङ टिमको लागि अत्यन्त महत्वपूर्ण हुने र उनको युवा जोशले टिम र विशेष गरी युवा खेलाडीहरूलाई प्रेरणा दिने बताए ।
नेपाल प्रिमियर लिग २०२४ आगामी मंसिर १५ मा शुरु भई पौष ६ गतेसम्म चल्नेछ ।
यो खबर पढेर तपाईलाई कस्तो महसुस भयो ?
प्रतिक्रिया