रवि लामिछानेलाई आज पाँचौंपटक म्याद थपका लागि अदालत लगिँदै

पोखरा । सहकारी ठगी प्रकरणमा पक्राउ परेका राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेलाई म्याद थपका लागि आज पाँचौं पटक कास्की जिल्ला अदालतमा उपस्थित गराइँदै छ ।

गत कात्तिक २५ गते थपिएको १३ दिनको म्याद सकिएसँगै आज उनलाई अदालत उपस्थित गराउन लागिएको हो ।

सहकारी ठगी प्रकरणमा अनुसन्धानका लागि गत कात्तिक २ गते काठमाडौंको बनस्थलीस्थित रास्वपा कार्यालयबाट पक्राउ परेका लामिछाने ३ कात्तिकदेखि जिल्ला प्रहरी कार्यालय कास्कीको हिरासतमा छन् । उनीमाथि सहकारी ठगीका अलावा संगठित अपराध र सम्पत्ति शुद्धीकरण मुद्दामा पनि अनुसन्धान भइरहेको छ ।

पोखराको सूर्यदर्शन सहकारीको रकम काठमाडौंस्थित गोर्खा मिडिया प्रालिमा प्रयोग गरेर अपचलन गरेको आरोपमा कास्की प्रहरीको हिरासतमा रहेका उनलाई त्यहीँ हुँदाहुँदै बुटवलस्थित सुप्रिम सहकारीको रकम हिनामिनाको अनुसन्धानका लागि बुटवल पनि लगिएको थियो ।

आज म्याद थप भएपछि उनलाई काठमाडौंको कालिमाटीस्थित स्वर्णलक्ष्मी सहकारीको बचत अपचलन प्रकरणमा अनुसन्धानका लागि काठमाडौं ल्याउन प्रक्रिया अघि बढाइने भएको छ । लामिछाने र नेपाल प्रहरीका पूर्व डीआईजी छविलाल जोशीविरुद्ध गोर्खा मिडिया नेटवर्कमा रहँदा स्वर्णलक्ष्मी सहकारीको बचत अपचलन प्रकरणमा अनुसन्धान गर्न काठमाडौं जिल्ला अदालतले पक्राउ पुर्जी जारी गरेको थियो । जोशीलाई भने बयान लिएर पोखरा लगिसकिएको छ ।

यसैगरी, चितवनको सहारा सहकारीको रकम पनि गोर्खा मिडियामा प्रयोग गरेर अपचलन गरेको आरोप रवि लामिछानेसहित १० जनाविरुद्ध पक्राउ पुर्जी जारी भइसकेको छ ।

प्रहरीका अनुसार पोखराको सूर्यदर्शन, बुटवलको सुप्रिम सहकारी र चितवनको सहारा सहकारीबाट रवि लामिछानेकै नाममा कुनै पनि कर्जा गएको देखिएको छैन । तर यी सहकारीको रकम गोर्खा मिडिया प्रालिमा गएको देखिएको र त्यसपछिको कारोबार तथा खर्चमा रवि पनि जोडिएकाले उनी अनुसन्धानको दायरामा परेका हुन् ।