काठमाडौं । नेपाली कांग्रेसका महामन्त्री गगनकुमार थापाले माओवादी केन्द्रका अध्यक्ष पुष्पकमल दाहाल प्रचण्डले कांग्रेसलाई प्रधानमन्त्री बनाउन खबर पठाउने गरेको टिप्पणी गरेका छन् ।
बिहीबार अपरान्ह कीर्तिपुर नगरपालिकाको उपनिर्वाचनको बृहत चुनावी सभालाई सम्बोधन गर्दै महामन्त्री थापाले सो कुरा बताएका हुन् ।
‘अहिले पनि हप्तामा एकपटक प्रचण्डले कांग्रेसलाई खबर पठाइरहनुहुन्छ लौन प्रधानमन्त्री बनिदिनुपर्यो भनेर । खबर पठाउने काम पहिले अर्कैले गथ्र्यो,’ महामन्त्री थापाले भने ।
कांग्रेस अहिले पनि संसद्को सबैभन्दा ठूलो दल रहेको बताउँदै कांग्रेसले आफू प्रधानमन्त्री बन्ने भन्दा पनि देशलाई स्थिर बनाउनेतर्फ लागेका कारण कहिले प्रचण्ड र कहिले ओलीलाई प्रधानमन्त्री मानेको बताए ।
हिजो शान्ति प्रक्रियाको बेलाबाटै नेपाली कांग्रेसले देशलाई सही ट्रयाकमा ल्याउन पहल गरेको बताउँदै अहिले पनि कांग्रेस सोही बाटोमा हिडिँरहेको बताए ।
उनले कीर्तिपुर नगरपालिकामा नेपाली कांग्रेसबाट मेयरको उम्मेदवार बनेका कृष्णमान डंगोललाई निर्वाचित गराउन समेत आग्रह गरे ।
यो खबर पढेर तपाईलाई कस्तो महसुस भयो ?
प्रतिक्रिया