धादिङको कृष्णभीरमा ग्यासको बुलेट दुर्घटना, चालक र सहचालक बेपत्ता

काठमाडौं । धादिङमा ग्यास बुलेट दुर्घटनामा परेको छ ।

चितवनबाट ग्यास बोकेर काठमाडौं आइरहेको बुलेट धादिङको बेनिघाट रोराङ गाउँपालिका–७ कृष्णभीरमा दुर्घटना परेको हो ।

जिल्ला ट्राफिक प्रहरी कार्यालय धादिङका अनुसार आइतबार बिहान उक्त ग्यास बुलेट सडकबाट तल खसेको हो । तर अहिलेसम्म कोही पनि भेटिएका छैनन् । चालक र सहचालकको खोजी भइरहेको प्रहरीले जनाएको छ ।

दुर्घटनापछि उद्धारमा खटिएको प्रहरीले गाडीको केही भाग भीरमा अड्किएको अवस्थामा फेला पारेको छ ।

सो क्षेत्र नजिकैका वासिन्दालाई आवश्यक सतर्कता अपनाउन अनुरोध गरिएको छ । ग्यास चुहावट भएको देखिएमा तुरुन्त प्रहरीको १०० नम्बरमा जानकारी गराइदिन पनि अनुरोध गरिएको जिल्ला ट्राफिक प्रहरी कार्यालय गजुरीका प्रहरी निरीक्षक सुरज श्रेष्ठले जानकारी दिए ।