गायिका सुशीला गौतमको ‘गुल्मी चन्द्रकोट’ बोलको गीत सार्वजनिक (भिडियोसहित) 

काठमाडौं । गुल्मीको चन्द्रकोट सेरोफेरोमा छायाङ्कन गरिएको गुल्मी चन्द्रकोट बोलको गीतको भिडियो सार्वजनिक भएको छ । गायिका सुशीला गौतम र गायक रेसम निर्दोषको स्वरमा सजिएको उक्त गीत बुधबार सार्वजनिक भएको हो । 

सुशीला गौतम युट्युब च्यानलमार्फत सार्वजनिक भएको उक्त गीतको शब्द रविन लामिछानेले कोरेका हुन् । ईश्वर सिंहले संगीत भरेको गीतलाई एचबीएन किस्मतले संगीत संयोजन, मिक्सिङ, मास्टरिङ गरेका छन् । 

गीतको भिडियोमा विनोद भण्डारी र सञ्जना गुरुङको अभिनय देख्न सकिन्छ । भिडियोलाई भण्डारीले नै निर्देशन गरेका हुन् । दिनेश पराजुलीले छायाङ्कन गरेको भिडियोलाई मनोज कार्कीले सम्पादन, कलर तथा जीएफएक्सको काम गरेका छन् । 

गुल्मीको चन्द्रकोट, शान्तिपुर, टिमुरे डाँडा, डिब्रुङ देवी मन्दिर लगायतका पर्यटकीय सम्भावना बोकेका ठाउँहरूलाई गीतको शब्दले उजागर गरेको छ । ‘आफ्नै जन्मभूमिलाई सम्झिएर गाएको गीत हो यो,’ गायिका गौतम भन्दै थिइन्, ‘आज सम्मको साङ्गीतिक जीवनमा सयौँ गीत गाएँ तर यो गीतले मलाई फेरि एक पटक गुल्मी मै पुर्‍याएको छ ।’ साथै, गुल्मीको परा पर्यटन प्रवर्धनमा यो गीति भिडियोले एउटा इट्टा थप्ने उनको विश्वास छ । गायिका गौतम गुल्मीको शान्तिपुरमा जन्मिएकी हुन् ।