दुबई पठाइदिन्छु भन्दै ठगी गर्ने युवक पक्राउ

काठमाडौं । बेरोजगार युवायुवतीहरुलाई आकर्षक तलबको प्रलोभनमा पारी दुबई पठाइदिन्छु भन्दै ठगी गरेको आरोपमा एक जना पक्राउ परेका छन्  । पक्राउ पर्नेमा रुपन्देही बुटवल उपमहानगरपालिका- १३ नयाँगाउ घर भई हाल काठमाडौं टोखा बस्ने  ३७ वर्षीय बुद्धि बहादुर बस्याल रहेका छन् । 

बस्यालले दुबई पठाइदिन्छु भन्दै एक जना पीडितलाई लामो समयसम्म झुकाएर १ लाख ९० हजार लिई सम्पर्क विहीन भएको भन्ने पीडितको उजुरीको आधारमा काठमाडौं उपत्यक अपराध अनुसन्धान कार्यालयबाट खटिएको प्रहरी टोली उनलाई काठमाडौंको बगबजारबाट बिहीबार पक्राउ गरेको हो ।

पक्राउ पश्चात् उनलाई थप अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको प्रहरीले जनाएको छ ।