निकासी पैठारी संघमा शिवकुमार अग्रवालको नेतृत्वमा नयाँ कार्यसमिति

काठमाडौं । नेपाल समुद्रपार निकासी पैठारी संघको अध्यक्षमा शिवकुमार अग्रवाल चयन भएका छन् । आइतवार काठमाडौंमा सम्पन्न संघको ४४औं वार्षिक साधारण सभाबाट आगामी कार्यकालका लागि अग्रवालको नेतृत्वमा सर्वसम्मतिले नयाँ कार्यसमिति चयन भएको हो । 

नयाँ कार्यसमितिको प्रथम उपाध्यक्षमा अनिलकुमार अग्रवाल, द्वितीय उपाध्यक्षमा गौरव शारदा र महासचिवमा जयन्तकुमार अग्रवाल चुनिएका छन् । त्यसै गरी प्रथम सचिवमा स्वाती रुंगटा अग्रवाल, द्वितीय सचिवमा विष्णुकुमार जोशी र कोषाध्यक्षमा ऋषिराज मोर चुनिएको संघले एक विज्ञप्तिमार्फत जानकारी दिएको छ । 

कार्यसमितिमा आकाश गोल्छा, कुमारबहादुर कार्की, गोविन्दलाल संघई, दीपेश खेतान अग्रवाल, निर्मल पौडेल, प्रदीप राजगाढिया, प्रभातकुमार सर्राफ, वसन्त अग्रवाल, मदन मित्तल, मयंक केडिया, रामचन्द्र खेतान, विमल सिद्धार्थ वैद, सुमितकुमार वंशल र सञ्जय अग्रवाल सर्वसम्मतिबाट चुनिएका छन् । 

नवनिर्वाचित कार्यसमितिको परामर्शमा अध्यक्ष शिवकुमार अग्रवालले अभिनव चुरीवाल, पंकल जालान, रुपाली सिकारिया र डिल्ली रत्न तुलाधरलाई कार्यसमितिमा मनोनीत गरेका छन् । संघको विधानमा कार्यसमितिमा २० जना सदस्य प्रत्यक्ष निर्वाचनबाट र चार जना सदस्य अध्यक्षले निर्वाचित कार्यसमितिको परामर्शमा मनोनीत गर्ने प्रावधान छ । निवर्तमान अध्यक्ष र त्यसअघिका अध्यक्ष कार्यसमितिमा पदेन सदस्यका रूपमा रहने व्यवस्था संघको विधानमा छ । 

नवनिर्वाचित अध्यक्ष अग्रवालले ‘सशक्त व्यवसाय, समृद्ध राष्ट्र निर्माण’ नारालाई निर्देशक सिद्धान्त मानेर व्यवसायमैत्री वातावरणलाई अझ मजबुत बनाउने र व्यवसायीको हकहितको पक्षमा पैरवी गर्नेतर्फ नयाँ कार्यसमितिको प्रयास केन्द्रित गर्ने प्रतिबद्धता व्यक्त गरेका छन् । 

संघको ४४औं वार्षिक साधारण सभा उद्घाटन सत्रलाई सम्बोधन गर्ने क्रममा प्रधानमन्त्रीका आर्थिक एवं विकास सल्लाहकार तथा राष्ट्रिय योजना आयोगका पूर्व उपाध्यक्ष डा. युवराज खतिवडाले पछिल्लो ५÷६ वर्षमा सरकारले लिएको नीतिले नै अर्थतन्त्रको अवस्था बिग्रिएको भन्दै त्यसलाई सही बाटोमा ल्याउन वर्तमान सरकार लागिपरेको बताए । 

संघले उठाएका थुप्रै मुद्दामा आफ्नो सहमति रहेको भन्दै डा. खतिवडाले त्यसमा सुधार गरिने तर सुधार प्रक्रियाले समय लिन सक्ने बताए ।