कपिलवस्तुमा पिकअपको ठक्करबाट बालिकाको मृत्यु

काठमाडौं । कपिलवस्तुमा पिकअपको ठक्करबाट बालिकाको मृत्यु भएको छ । बाणगंगा नगरपालिका-८ चप्परगाउँस्थित सडकमा अर्घाखाँचीबाट बुटवलतर्फ जाँदै गरेको लु.३ च ३३९५ नम्बरको पिकअपको ठक्करबाट बालिकाको मृत्यु भएको हो ।

मृत्यु हुनेमा सोही ठाउँ बस्ने ३० वर्षीया रिता भुसालकी छोरी ३ वर्षीया अप्सना भुसाल रहेकी छन् ।

ठक्करबाट गम्भीर घाइते भएकी उनको सिटी अस्पताल बुटवलमा थप उपचारको क्रममा सोमबार बिहान मृत्यु भएको हो । साथै ठक्करबाट घाइते भएकी रिताको सोही अस्पतालमा उपचार भइरहेको छ ।

प्रहरीले पिकअप चालकलाई नियन्त्रणमा लिई दुर्घटनाका सम्बन्धमा आवश्यक अनुसन्धान गरिरहेको छ ।