काठमाडौं । समाजवादी मोर्चाले आगामी माघ १६ गते काठमाडौंमा बृहत कार्यक्रम गर्ने निर्णय गरेको छ । आज एकीकृत समाजवादीको कार्यालय आलोकनगरमा बसेको समाजवादी मोर्चाको बैठकले सो निर्णय गरेको हो ।
बैठकपछि सञ्चारकर्मीहरुसँग कुरा गर्दै नेपाल कम्युनिष्ट पार्टी (नेकपा) का प्रवक्ता खड्गबहादुर विश्वकर्माले सो कार्यक्रम गर्ने जानकारी दिँदै आगामी दिनमा मोर्चालाई थप गतिशील बनाउँदै लैजाने समेत बताए ।
‘आगामी माघ १६ गते काठमाडौंमा समाजवादी मोर्चाका तर्फबाट भव्य कार्यक्रम गर्ने भन्ने निर्णय गरेका छौँ । त्यो कार्यक्रम सम्पन्न भएपछि जतिपनि प्रश्न उठेका छन् तीनको उत्तर दिनेछ र यसले थप सकारात्मक सन्देश दिन्छ,’ उनले भने ।
यसअघि बसेको बैठकले समाजवादी मोर्चाको भए गरेका सबै कामको संश्लेषण गरेर प्रतिवेदन तयार गर्ने, सीमा पनि उल्लेख गर्ने र आगामी कार्यक्रम प्रस्ताव गर्ने जिम्मेवारी दिइएको थियो । आगामी माघ १२ गतेसम्म त्यसको प्रतिवेदन तयार गरेर नेतृत्वलाई बुझाउने तयारी भइरहेको उनले बताए ।
यो खबर पढेर तपाईलाई कस्तो महसुस भयो ?
प्रतिक्रिया