सुदूरपश्चिममा एमालेलाई ठूलो झट्का, ५९ नेता–कार्यकर्ता एकसाथ रावलको पक्षमा उभिए

काठमाडौं । नेकपा एमालेले पार्टीका पूर्व उपाध्यक्ष डा. भीमबहादुर रावललाई पार्टीको साधारण सदस्यसमेत नरहने गरी निष्कासन गरेपछि उनको गृहप्रदेश सुदूरपश्चिममा एमाले छाडेर उनलाई साथ दिनेको संख्या दिन प्रतिदिन बढ्दै गइरहेको छ ।

पछिल्ला दिनमा नेकपा एमालेका ५९ जना नेता–कार्यकर्ताले डा.रावल नेतृत्वको मातृभूमि जागरण अभियानलाई समर्थन गर्ने घोषणा गरेका छन् । उनीहरु संयुक्त विज्ञप्ति निकालेर रावलको पक्षमा उभिएका हुन् ।

नेकपा एमाले केन्द्रीय पर्यटन विभाग सदस्य रमेशबहादुर कुँवर, नेकपा एमाले सुदूरपश्चिम प्रदेश कमिटी सदस्यहरु चक्र रावल, जंग विक, केशर मियाँ, निर्मला रावल, दूधकला विष्टलगायतको नाम ५९ जनाको सूचीमा रहेको छ ।

रावलको पक्षमा खुलेकाहरुले डा. रावलमाथि गरिएको निर्णय ‘स्वेच्छाचारी’ र एमाले अध्यक्ष केपी शर्मा ओलीको ‘सत्ता उन्मादी’ भनेर आलोचना गरेका छन् ।

रावललाई एमालेको २०८१ पुस १० गतेको सचिवालय बैठकले पार्टीबाट निष्कासन गरेको थियो ।

हेर्नुहोस् संयुक्त विज्ञप्तिमा उल्लेख गरिएका नाम