तराईमा बढ्यो सवारी दुर्घटना : धनुषामा ६ महिनामा २६ जनाको मृत्यु

काठमाडौं । पछिल्ला दिनहरुमा सडक दुर्घटना बढिरहेका छन् । विशेष त तराईका जिल्लाहरुमा दुर्घटनाका कारण धेरैले ज्यान गुमाइरहेको तथ्यांक सार्वजनिक भइरहेका छन् ।

विगत ६ महिनाको अवधिमा नै सडक दुर्घटनामा परी धनुषामा २६ जनाको मृत्यु भएको छ ।

जिल्ला ट्राफिक कार्यालयका अनुसार उक्त अवधिमा भएका पाँच सय छ दुर्घटना भएको र उक्त दुर्घटनामा परी २६ जनाको मृत्यु भएको हो ।

त्यसो त अघिल्लो वर्षको सोही अवधिमा धनुषामा पाँच सय ९८ दुर्घटना भएको थियो, जसमा ३९ जनाले ज्यान गुमाएको जिल्ला ट्राफिक प्रहरी कार्यालयले जनाएको छ ।

त्यस्तै समीक्षा अवधिमा ट्राफिक नियम उल्लघंन गरेका १२ हजार पाँच सय ९३ सवारीसाधनका सञ्चालकबाट ९७ लाख ५८ हजार पाँच सय राजस्व संकलन भएको जनाएको छ ।

गत आवको सोही अवधिमा १४ हजार दुई सय ३६ सवारीसाधनबाट एक करोड छ लाख ५४ हजार पाँच सय राजस्व संकलन भएको थियो ।