महोत्तरीमा धानको बीउ ब्याडमै सुक्यो, किसानलाई असार निरस

काठमाडौं । असारे गीत गाउँदै हिलाम्य खेतमा पसेर धान रोपिने असार महीना यसपालि महोत्तरीका किसानका लागि उत्साहपूर्ण देखिँदैन । असार तेस्रो साता बित्नै लाग्दासम्म धान रोपाइँ गर्न नपाएपछि यहाँका किसानका लागि असार निरस बनेको हो ।

यसअघि पटकपटक लगाइएको धानको बीउ प्रचण्ड घामले ब्याडमै डढ्दा रोपाइँ गर्न नपाइएको किसानको बिलौना छ । “असार १० अघि पानी पर्न सकेन, बीउ ब्याडमै डढेर गयो, धान नै रोप्न नपाएपछि पर्वको के उल्लास हुनु ?”,

जिल्लाको भङ्गहा नगरपालिका–४ रामनगरका युवा किसान ३५ वर्षीय चन्देश्वर राय दनुवारले विरक्तिदै भने । जिल्लामा यसपालि असार १० अघिको प्रचण्ड घामको रापले धानको बीउ मात्र नभएर उखुबाली, फलफूल बिरुवा र लहरे तरकारी (लौका, फर्सी, करेला, चिचिण्डो, बोडी, झिमनी र घिरौँला)लगायत बिरुवा सुकिसकेको किसान बताउँछन् ।

असार १० यता परेको पानीले धानबाहेकका अन्य बालीको रोगन फर्काए पनि (पहँेलिएका बोट हरियो भएका) धान भने बीउकै अभावले रोपाइँ गर्न नसकिएको दाबी उनीहरुको छ ।
“अखाड १० एम्हर दुचार दिन बारिस भऽ खेतसब पाइन सऽ भरल अई, मुदा बिछन नई भेला सऽ मौगत भोइग रहल छि” (असार १० यता दुई÷चार दिन परेको पानीले खेतका गह्रा टन्न भरिएका छन्, तर के गर्नु ? बीउ नै नभएपछि मन रनभुल्ल परिएको छ), बर्दिवास–९ पशुपतिनगरका ८० वर्षीय वृद्ध किसान नथुनी महतोले भने ।

यतिखेर घरगुजाराको मुख्यबाली धान रोप्न नपाएपछि यहाँका किसान जहानपरिवारको प्रतिपाल यसपालि कसरी गर्ने भन्ने चिन्तामा छन् । मुख्यबाली नै समयमा लगाउन नपाएपछि अनिकाल पो लाग्ने हो कि भन्ने चिन्ताले छोपेको भङ्गाहा–४ कै किसान दीपमायाँ श्रेष्ठ बताउछन् ।

महोत्तरीमा जेठ दोस्रो सातातिर पानी परे पनि हिले ब्याड राख्ने गरी पानी नपर्दा यहाँका किसानले धुलेब्याड राखेका थिए । तर त्यसयता लगातार चर्को घाम बढ्दै जाँदा बीउ ब्याडमै खङ्गरङ्ग सुकेकाले असार पन्ध्र धान दिवसका अवसरमा पनि यहाँका किसानले बीउ अभावका कारण धान रोपाइँ हुन नसकेको हो ।

जेठको तेस्रो साताभित्र बीउ राखिसक्ने र असार तेस्रो साताभित्र धानको मूल (शाही) रोप (धानको मूल रोप र खरुअन (कलम) रोप गर्ने चलन छ) सक्ने किसानको तालिका यसपालि पानीको अभावले खज्मजिएपछि आम किसानमा अन्नको सङ्कट हुने डर बढेको छ ।

असार तेस्रो साताभित्र शाहीरोप सक्ने र त्यो रोपेको गाँजिएपछि उखेलेर साउन तेस्रो साताभित्र खरुअन (कलम) को रोपाइँ सक्ने धान खेतीको तालिका हुने गरेको यहाँका किसान बताउँछन् । तर, धेरैजसो आकासे पानीको भरमा गरिने यहाँको धान खेती समयमा पानी नपरेपछि आफुहरु रनभुल्लमा परेको औरही नगरपालिकाको भोइल बस्तीका किसान मोहन महतो बताउछन् ।

महोत्तरी जिल्लामा कूल खेतीयोग्य जग्गामध्ये करीब ५२ हजार हेक्टरमा धान खेती हुँदै आएको छ । पानीको अनुकूलता÷प्रतिकूलतामा धान खेतीको क्षेत्रफल बर्सेनी घटबढ हुने गरेको छ ।
जिल्लामा कूल खेतीयोग्य जग्गामध्ये १० प्रतिशत मात्र सिञ्चित रहेकाले यहाँको धेरैजसो खेती आकासे पानीमै भर पर्नुपर्ने स्थिति रहेको कृषि ज्ञान केन्द्र डिभिजन कार्यालय मलङ्गवा (महोत्तरी र सर्लाही कार्यक्षेत्र) सर्लाहीका अन्नबाली विज्ञ रामकैलाश साह बताउनुहुन्छ । जिल्लामा यसपालि अहिलेसम्म १०÷१२ प्रतिशत मात्र रोपाइँ हुन सकेको छ ।

जिल्लामा सिञ्चित मानिएका जग्गामा ल्याइने पानीका मुहान पनि यसपालि जेठको प्रचण्ड गर्मीमा सुकेकाले त्यस्ता जग्गामा पनि अपेक्षित रोपाइँ हुन सकेको छैन । कुलो नहरबाट ल्याइएका पानीका स्रोतका मुहान पछिल्लो वर्षापछि बल्ल रसाउन थालेका छन् ।

जिल्लामा रातु, बडहरी, ओक्सी, जङ्घा, मरहा, भब्सी, कुटमेश्वरी, बाँकेलगायतका नदी बगे पनि यी नदीको पानी खेतबारीमा सिँचाइ गर्न नभएर बर्खेभेलमा घरखेत बगाउने, कटान गर्ने पीडादायी मात्र रहँदै आएका किसानको दुःखेसो छ ।

पानीकै अभावले कुनै खेती समयमा लगाउन नपाउँदा अपेक्षित उत्पादन कहिल्यै लिन नसकेको किसानको भनाइ छ । जिल्लाका १० नगरपालिका र पाँच गाउँपालिकासहित १५ स्थानीय तहले कृषिलाई पहिलो प्राथमिकता दिएको बताउँदै आए पनि मुख्य कुरा सिँचाइ प्रबन्ध गर्न रुचि नदेखाएका किसान बताउँछन् ।