आर्थिक वर्ष २०७६/७७ को बजेट पारित

हेटौँडा-प्रदेश नं ३ प्रदेशसभाको आज बसेको बैठकले सरकारद्वारा आगामी आर्थिक वर्ष २०७६÷७७ का लागि विनियोजित बजेट बहुमतद्वारा पारित गरिएको छ । बैठकमा आर्थिक मामिला तथा योजनामन्त्री कैलाशप्रसाद ढुङ्गेलले विनियोजित बजेटलाई पारित गरियोस् भनी प्रस्ताव राखेका थिए।

सोही बैठकले राजश्व र व्ययको अनुमानसम्बन्धी विधेयक २०७६ र प्रदेशमा आर्थिक ऐन कार्यान्वयनसम्बन्धी विधेयक २०७६ लाई पनि बहुमतले पारित गरेको छ ।
प्रदेशसभा सदस्यहरु न्च्छेनारायण श्रेष्ठ, रमेश पौडेल, सृजना सैजु, सुरेन्द्रराज गोसाईं र रिना गुरुङले विभिन्न शीर्षकमा छुट्टयाएको बजेट कटौति गरी एक रुपैयाँ मात्र कायम गरियोस् भनी प्रस्ताव राखेका थिए ।
प्रदेश सभामुख सानुकुमार श्रेष्ठले उनीहरुलाई प्रस्ताव फिर्ता लिनुस् भनी गरेकाे रुलिङमा प्रदेशसभा सदस्यहरुले फिर्ता नलिने अडान लिएका थिए ।

बैठकमा उक्त प्रस्ताव निर्णयार्थ प्रस्तुत हुँदा बहुमतले अस्वीकृत गरिएको थियो । प्रदेश सरकारको आर्थिक मामिला तथा योजनामन्त्री ढुङ्गेलले असार १ गते आगामी आवका लागि कूल रु ४७ अर्ब ६० करोड ७९ लाख बजेट प्रस्तुत गरेका थिए । प्रदेशसभाको बैठकमा असार १० गतेदेखि मुख्यमन्त्री तथा मन्त्रिपरिषद् कार्यालय तथा विभिन्न ६ मन्त्रालयसँग सम्बन्धित विनियोजित शीर्षकमा दफावार छलफल भई आज बजेट पारित गरिएको हो ।

प्रदेश सभामुख श्रेष्ठले अर्को बैठक सूचना जारी नभएसम्मका स्थगित गरिएको जानकारी दिनुभएको थियो । प्रदेशसभामा १०९ प्रदेशसभा सदस्यहरुको उपस्थिति रहेको प्रदेशसभा सचिवालयले जनाएको छ ।