काठमाडौं । सुनसरी सदरमुकाम इनरुवासहित जिल्लाको विभिन्न स्थानमा गैरकानूनी रुपमा सिसी क्यामरा जडान गरेको पाइएको छ ।
सदरमुकाम इनरुवा, धरान, इटहरी लगायतका क्षेत्रमा रहेको विभिन्न पसल तथा सरकारी र गैरसरकारी संस्थाहरुमा गैरकानूनी रुपमा सिसी क्यामरा जडान गरेको पाइएको हो । सुन पसल, कस्मेटिक पसल, प्राइभेट बैंकहरुले गैरकानूनी रुपमा सिसी क्यामरा जडान गरेको जिल्ला प्रशासन कार्यालय सुनसरीको तथ्याङ्कले देखाएको छ ।
इनरुवा–१ मा रहेको अलख निरञ्जन ज्वेलर्स, महालक्ष्मी ज्वेलर्स, झरना सोनी ज्वेलर्स, एस के स्टोर, एभरेस्ट स्टोर, एनआइसी एसिया बैंकलगायतका दर्जनौँ कपडा पसल, सुन पसल, कस्मेटिक पसल, वित्तीय संस्थाहरुमा सिसी क्यामरा जडान गरेको भए पनि जिल्ला प्रशासन कार्यालय सुनसरीबाट अनुमति नलिइ सिसी क्यामरा जडान गरेको प्रशासन कार्यालय सुनसरीका नायब सुब्बा मणिराज पोखरेलले बताउनुभयो ।
सिसी क्यामरा जडान गर्नका लागि गृह मन्त्रालयको निर्देशिकाअनुसार कि त प्रशासन कार्यालयलाई जानकारी दिनुप¥यो, कि त अनुमति लिनुपर्ने भन्ने कानूनी प्रावधान भएको भए पनि जिल्ला प्रशासन सुनसरीबाट न त अनुमति नै लिएको, न त जानकारी नै गराई सिसी क्यामरा जडान गरेको प्रशासन कार्यालयका नायव सुब्बा पोखरेलको भनाइ छ ।
सुनसरीमा सिद्धार्थ बैंक धरान, नेपाल बैंक बराहाक्षेत्र, विजयपुर हस्पिटल धरान, सानिमा बैंक इनरुवा, जनता बैंक इनरुवा, किसान कल्याण बचत तथा ऋण सहकारी संस्था इटहरी शिभिल बैंक इटहरी, सनराइज बैंक झुम्का, नेपाल बैंक झुम्का, नेपाल बैंक इटहरी, सिद्धार्थ बैंक ले जिल्ला प्रशासन कार्यालय सुनसरीबाट अनुमति लिएर सिसी क्यामरा जडान गरेको कार्यालयको तथ्याङ्कले देखाएको छ ।
बैंक तथा अस्पतालहरुले अनुमति लिएर सिसी क्यामरा जडान गरेको भए पनि इनरुवा, इटहरी र धरानमा योबाहेक दर्जनाँै पसल तथा वित्तीय संस्थाहरुले गैरकानूनी रुपमा सिसी क्यामरा जडान गरेका छन् ।
सिसी क्यामरा जडान तथा सञ्चालनसम्बन्धी कार्यविधि २०७२ अनुसार सिसी क्यामरा जडान गर्ने उद्योग, पसल, वित्तीय सस्ंथाले सिसी क्यामरा जडान गरेको १५ दिनभित्रमा इलाका प्रहरी कार्यालय-जिल्ला प्रहरी कार्यालय वा जिल्ला प्रशासन कार्यालयलाई जानकारी वा अनुमति लिनुपर्ने व्यवस्था छ ।
सिसी क्यामरा जडान गर्नका लागि प्रयोजन खुलेको निवेदन पत्र, व्यक्तिको नागरिकताको प्रतिलिपि-परिचय खुल्ने अन्य कागजातहरु, घरको नक्साको प्रतिलिपि, जग्गाधनी प्रमाणपत्रको प्रतिलिपि, गाउँपालिका-नगरपालिकाको सिफारिस र सिसी क्यामरा निगरानीका लागि सम्बन्धित पक्षबाट खटिने व्यक्तिको विवरण आवश्यक पर्दछ ।
तर यी कुनै कागजात पेश नगरीकन वा जानकारी नै नगराईकन सदरमुकाम इनरुवा, इटहरी र धरानमा दर्जनौँ पसलहरुले सिसी क्यामरा जडान गरेको पाइएको प्रशासन कार्यालयका नायब सुब्बा पोखरेलले बताउनुभयो ।
सुरक्षाको हिसाबले सिसी क्यामरा जडान गर्नु राम्रो पक्ष भए पनि पर्याप्त ज्ञानको अभावका कारणले पनि पसल, विभिन्न सरकारी कार्यालय, वित्तीय संस्थाहरुले जानकारी बेगर सिसी क्यामरा जडान गरेको हुनसक्ने सुनसरीका प्रहरी नायब उपरीक्षक ज्ञानेन्द्रप्रसाद फुयाँलले बताउनुभयो ।
यो खबर पढेर तपाईलाई कस्तो महसुस भयो ?
प्रतिक्रिया