मानव अधिकार र प्रेस स्वतन्त्रताको संरक्षण पहिलो प्राथामिकता : डिएसपी राई

महेन्द्र चापागाई / नवलपरासी, २७ भदौ ।नवलपरासीको ईलाका प्रहरी कार्यालय नवलपुर कावासोतीका ईन्चार्ज प्रहरी नायव उपरिक्षक नविनराज राईले मानव अधिकार र प्रेस स्वतन्त्रताको संरक्षण आफ्नो पहिलो प्राथामिकता भएको बताएका छन । ईलाका प्रहरी कार्यालय नवलपुर कावासोतीमा सोमबार आयोजना गरिएको परिचयात्मक तथा नागरिक अगुवा भेटघाट कार्यक्रममा बोल्दै डिएसपी राईले नागरिकसंग साझेदारी गर्नु प्रहरीको कर्तव्य भएको बताएका छन ।काभ्रेबाट सरुवा भई नवलपरासी आएका डिएसपी राईले नवलपुरको शान्ती सुरक्षा कायम गर्न आँफुले कुनै कसर बाँकि नराख्ने बताए । डीएसपी राईले यस क्षेत्रमा नागरिकहरूको पीरमर्का, गुनासो तथा कानुनी कारबाही, नागरिक भेटघाट, घरदैलो कार्यक्रम,सामुदायीक प्रहरी सेवाको भूमिका, सूचना र प्रविधिको उच्चतम प्रयोग, नागरिक सुनुवाई, शान्तिदूत कार्यक्रमलगायत अभियान चलानुको साथै लागुऔषध दुव्र्यसनी नियन्त्रण, ट्राफिक सचेतना, अवाञ्छित घटना नियन्त्रण, सवारी दुर्घटनामा प्रहरी बढी सचेत हुनुपर्ने आफुले पाएकोले सो सम्बन्धि विकृति, विसंगतिहरु अन्त्य गर्न आफुले योजना बनाई अगाडि बढ्ने बताए । नवलपुरमा हाल रहेको जनशक्तिलाई थप क्रियासील बनाउदै शान्ति सुरक्षा मजवुद बनाउनेसमेत आफ्नो योजना रहेको राईले सुनाए । यसअघि कावासोतीमा कार्यरत डिएसपी राजेश थापाको सर्लाही सरुवा भए पछि नवलपुर कावासोतीमा नयाँ डिएसपीको रुपमा राईलाई पठाईएको हो ।कार्यक्रममा नवलपुरका विभिन्न राजनितिक दलसँग आवद्ध दलका प्रमुख तथा प्रतिनिधीहरू संघसंस्था, पत्रकार, उद्योगी व्यवसाय लगायतको उपस्थिती रहेको थियो । कार्यक्रममा उपस्थित नागरिक अगुवाहरुले नवलपुरको शान्ति सुरक्षा देखि नागरिकका हरेक समस्यामा प्रहरी नागरिकमैत्री हुनु पर्ने बताएका थिए ।