चिकित्सा शिक्षामा ७५ प्रतिशत छात्रवृत्ति माग गर्दै प्रदर्शन

काठमाडौं । चिकित्सा शिक्षामा ७५ प्रतिशत छात्रवृत्ति दिन माग गर्दै चिकित्सा शास्त्रका विद्यार्थीहरुले प्रदर्शन गरेका छन् । छात्रवृत्तिसँगै सबै विश्वविद्यालयको साझा एकीकृत प्रवेश परीक्षाको माग गर्दै उनीहले मंगलबार प्रदर्शन गरेका हुन् ।

काठमाडौंको माइतीघरदेखि नयाँ वानेश्वरसम्म चिकित्सा शिक्षा संघर्ष समितिको नामबाट भएको प्रदर्शनका सहभागीले ७५ प्रतिशत छात्रवृत्तिसम्बन्धी शिक्षा मन्त्रालयले दिएको निर्देशन पालना गर्न मेडिकल कलेजसँग माग गरेका छन् ।

त्यस्तै निजी मेडिकल कलेजहरुले लिएका अतिरिक्त शुल्क फिर्ता गर्नुपर्ने, स्वास्थ्यकर्मीको उचित तलब र सुविधा कायम हुनुपर्ने, नर्सिङ भोलिन्टियरिङ बन्द गर्नुपर्ने लगायतका माग राखेका छन् ।

माइतीघरबाट सुरु भएको विरोध प्रदर्शन नयाँ वानेश्वरमा आएर टुंगिएको थियो ।