एक सय ९७ न्यायाधीश सरुवा

काठमाडौँ, २९ भदौ- न्यायपरिषद्को बुधबार बसेको बैठकले स्थानीय निकायको निर्वाचन हुन गइरहेको प्रदेश नं. २ सहित देशभरका सबै जिल्ला न्यायाधीशको सरुवा गरेको छ । निर्वाचन आचारसंहिता लागू भएको अवस्थामा सरुवा–बढुवा गर्न नपाउने प्रावधानविपरीत न्यायाधीशहरूको सरुवा भएको छ ।न्यायपरिषद्का अध्यक्षमा प्रधानन्यायाधीश, सर्वोच्चका वरिष्ठतम न्यायाधीश, कानुनमन्त्री तथा राजनीतिक नियुक्ति भएका दुईजना सदस्य रहन्छन् । बुधबार प्रधानन्यायाधीश गोपाल पराजुलीको अध्यक्षतमा बसेको बैठकले १९७ जिल्ला न्यायाधीश सरुवा गरेको हो ।परिषद्को बैठकले उच्च अदालतमा रहेका तीन न्यायाधीशलाई सर्वोच्चमा सरुवा गरेको छ । त्यसरी सरुवा हुनेमा उच्च अदालत तुलसीपुरका मुख्य न्यायाधीस बमबहादुर श्रेष्ठ, उच्च अदालत सुर्खेतका मुख्य न्यायाधीस डम्बरबहादुर शाही र उच्च अदालत पाटनका मुख्य न्यायाधीस टंकबहादुर मोक्तान छन् ।मुख्य निर्वाचन अधिकृत रहेका न्यायाधीसहरु मोहम्मद जुनेद आजाद भक्तपुर जिल्ला अदालतमा सरुवा भएका छन् । त्यस्तै जगतनारायण प्रधान जिल्ला अदालत ललितपुर सरुवा भएका छन् । महेन्द्रबहादुर कार्की पर्सा जिल्ला अदालतमा, मुरारीबाबु श्रेष्ठ चितवन जिल्ला अदालत, अमृतबाबु बस्नेत काठमाण्डौ जिल्ला अदालत, मेदनीप्रसाद पौडेल धनुषा जिल्ला अदालत र योगेन्द्रप्रसाद शाह कास्की जिल्ला अदालतमा सरुवा भएका छन्, नयाँ पत्रिकामा खबर छ ।