ला लिगा फुटबल: रियल शीर्ष स्थानमा

एजेन्सी । रियल म्याड्रिड स्पेनिस ला लिगा फुटबलको शीर्ष स्थानमा उक्लिएको छ ।

शनिबार भएको खेलमा डिपोर्टीभो अल्भेसलाई २-१ गोल अन्तरले पराजित गर्दै रियल लिगको शीर्ष स्थान कब्जा गरेको हो ।

अल्भेसको मैदानमा खेलको ५१ औं मिनेटमा सर्जियो रामोसले गोल गर्दै रियललाई अग्रता दिलाएका थिए । खेलको ६५ औं मिनेटमा लुकास परेजले पेनाल्टीमा गोल गर्दै घरेलु टोलीलाई खेलमा फर्काए ।

तर, खेलको ६९ औं मिनेटमा डानी कार्भाजलले गोल गर्दै रियललाई २-१ को जित दिलाए ।

जितसँगै रियलले १४ खेलमा ३१ अंक जोडेको छ । र, बार्सिलोनालाई ३ अंकले पछि पार्दै रियल शीर्ष स्थानमा उक्लिएको छ । बार्सिलोनाको २८ अंक रहेको छ ।