१३ औं सागलाई फर्केर हेर्दा …

बिप्लव जमकटेल

२०७६,मङ्सिर,२४,मंगलवार १७:३६

काठमाडौं । १३ औं संस्करणको दक्षिण एसियाली खेलकुद प्रतियोगिता (साग) आज सकिएको छ । आयोजक युवा तथा खेलकुद मन्त्रालय र राष्ट्रिय खेलकुद परिषद् राखेपले सागको समापनलाई भव्य बनाउने तयारी गरेका छन् ।

गत डिसेम्बर १ देखि औपचारिक रुपमा सुरु भएको १३औं (साग) को अन्तिम तथा १० औं दिन आज मंगलबार विभिन्न पाँच खेलमा प्रतिस्पर्धा भएको थियो ।

अन्तिम दिनसम्म भारत १ सय ७१ स्वर्ण सहित पदक हात पार्दै पहिलो स्थानमा रहेको छ । आयोजक नेपालले ५१ स्वर्ण पदक हात पार्दै दोस्रो स्थानमा कब्जा जमाएको छ ।

सागलाई फर्केर हेर्दा :

नेपालका मुख्य तीन शहरमा सञ्चालन भएको दक्षिण एसियाकै सबै भन्दा ठुलो खेल महोत्सवको मंसिर १५ गते औपचारिक उद्घाटन भएको थियो ।

१३ औं साग को उद्घाटन : १५ हजार जनाको प्रस्तुति, यस्तो छ ‘सेड्युल’

१३ औं दक्षिण एसियाली खेलकुद (साग) को भव्य उद्घाटन समारोहका बिच सुरु भएको थियो । त्रिपुरेश्वरस्थित दथरथ रंगशालामा आयोजित समारोहमा राष्ट्रपति विद्यादेवी भण्डारीले उद्घाटन गरेर सुरु भएको थियो ।

प्रतियोगितामा दक्षिण एसियाका ७ राष्ट्रले विभिन्न २६ खेलमा सहभागीता जनाएका छन् । आयोजक नेपाल सहित भुटान, भारत, माल्दिभ्स, बंगलादेश, पाकिस्तान र श्रीलंकाले सागमा प्रतिस्पर्धा गरेका छन् ।

दक्षिण एसियाली राष्ट्रलाई खेलकुदको माध्यमबाट जोड्ने उद्वेश्यकले सन् १९८४ मा सागको सुरुवात नेपालबाट भएको थियो । सन् १९९९ मा सागको दोस्रो पटक आयोजना गरेको थियो ।

नेपालले तेस्रो पटक यो प्रतियोगिताको आयोजना गरेको हो ।

प्रतियोगितामा कुल ३ सय २४ स्वर्ण सहित १ हजार १ सय ३५ पदकका लागि प्रतिस्पर्धा भएको हो ।

नेपालले सागको ईतिहासमा सबैभन्दा धेरै स्वर्ण पदक जित्न सफल भएको हो । पछिल्लो पटक घरेलु भुमिमा भएको आठौं सागमा नेपालले ३१ वटा स्वर्ण पदक जितेको थियो ।