ए डिभिजन लिगको दोस्रो चरणका खेल आजदेखि

काठमाडौं । आजबाट शहीद स्मारक ‘ए’ डिभिजन लिग अन्तर्गत दोस्रो चरणका खेलहरु सुरु हुने भएको छ ।

च्यासल युथ क्लब र मछिन्द्र क्लब पहिलो चरणमा जित हात पारेको थियो । भने दुबै टिम अपराजित यात्रालाई निरन्तरता दिने योजनामा रहनेछन् ।

दिउँसो १२ बजे एन्फा कम्प्लेक्स मैदानमा दोस्रो चरणको पहिलो खेलमा यिनै दुई टोली च्यासल र मछिन्द्र आमने–सामने रहनेछन् । साथै मछिन्द्रले उद्घाटन खेलमा सोही मैदानमा ब्रिगेड ब्वांइजलाई २–० ले पराजित गर्न सफल भएको थियो ।

त्यस्तै च्यासलले साविक उपविजेता संकटा क्लबलाई २–० ले नै पराजित गरेको थियो । गत सिजनको एक अंक ऋण तिरेको मछिन्द्रले पहिलो खेलमा ३ अंक जोडेको थियो । साथै अब पनि स्पष्ट ३ अंक जोड्ने लक्ष्य राखेको छ । च्यासल तथा मछिन्द्रका प्रशिक्षकले आफूहरुले लिग च्याम्पियन बन्ने लक्ष्य रहेको बताउदै आएका छन् । त्यसैकारण पनि दुवै टिमका लागि आजको खेल महत्त्वपूर्ण रहेको मानिएको छ ।

साथै आजै दिउँसो ३ बजे उद्घाटन खेल हारेको ब्रिगेडले दशरथ रंगशालमा फ्रेण्ड्सँग खेल्नेछ । ब्रिगेड र फ्रेण्ड्स दुवै जारी लिगमा पहिलो जितको खोजीमा हुनेछन् । फ्रेण्ड्स पहिलो खेलमा त्रिभुवन आर्मीसँग पराजित भएको थियो ।