सुकेधारामा बसको ठक्करबाट छात्राको मृत्यु : आक्रोशित विद्यार्थीद्वारा दुईवटा बसमा आगजनी

काठमाडौं। आज बिहान काठमाडौंको सुकेधारामा बसको ठक्करबाट पशुपति कलेजमा अध्ययनरत छात्राको मृत्यु भएपछि आक्रोशित विद्यार्थीहरुले दुईवटा बसमा आगजनी गरेका छन् ।

बिहान करिब पौने ६ बजे बा ४ ख ५९ २० नम्बरको बसले पैदल हिँडिरहेकी २२ वर्षीय सृष्टि पन्तलाई ठक्कर दिएर बस भागेको थियो । गोरखा घर भइ धुम्बाराही बस्दै आएकी पन्त बिबिएस चौथो वर्षमा अध्ययनरत थिईन् । दुर्घटनामा गम्भीर घाइते अवस्थामा उनलाई उपचारका लागि चाबहिलस्थित ओम अस्पताल लगिएको थियो । उपचारकै क्रममा उनको निधन भएको छ । बसका चालकलाई प्रहरीले नियन्त्रणमा लिएको छ ।

सहपाठीको मृत्युपछि सो क्याम्पसका विद्यार्थीहरु सडकमा विरोध प्रदर्शन गरिरहेका छन् । उनीहरुले बा ४ ख ७१०१ नम्बरको बसमा आगजनी गरेका छन् भने बा ३ ख ४४३३ नम्बरको बस तोडफोड गरेका छन् । प्रहरीले आगजनीमा संलग्न केही विद्यार्थीलाई नियन्त्रणमा लिएको छ । मृतकको शव अस्पतालमा छ ।