युभेन्ट्सलाई हराउँदै लाजिओको पोल्टामा सुपर कोपा उपाधि

एजेन्सी । सुपर कोपा इटालियाको उपाधि लाजिओले हात पारेको छ ।

आइतबार राति भएको फाइनल खेलमा युभेन्ट्सलाई ३-१ गोल अन्तरले पराजित गर्दै लाजिओले सिजनको पहिलो उपाधि हात पारेको हो ।

लाजिओका लागि जित दिलाउन लुइस अल्बेर्टो, सिनाडा लुलिक र डानिलो कटाल्डीले समान एक एक गोल गरे ।युभेन्ट्सका पाउलो डीबालाले एक गोल फर्काए ।

खेलको १६ औं मिनेटमा अल्बर्टोले गोल गर्दै लाजिओलाई अग्रता दिलाएका थिए । ४५ औं मिनेटमा डीबालाले गोल गर्दै युभेन्ट्सलाई खेलमा फर्काए ।

७३ औं मिनेटमा लुलिकले गोल गर्दै लाजिओको अग्रता २-१ को बनाए ।

खेलको ९० औं मिनेटमा रोड्रिगोले दुई पहेलो कार्डसहित रातो कार्ड पाउँदा युभेन्ट्स अन्तिम समय १० खेलाडीमा समेटिएको थियो । त्यसपछि खेलको इन्जुरी समयमा डानिलोले गोल गर्दै लाजिओलाई ३-१ को जित दिलाए ।