आजको दिन कुन राशिलाई शुभ, कुनलाई अशुभ ? हेर्नुहोस्

आज वि.सं. २०७६ पुस ९ गते , बुधवार । इ.स.२०१९ डिसेम्बर २५ तारिक । शकसंवत् १९४१ । परिधावी संवत्सर । दक्षिणायन । हेमन्त ऋतु । ने.सं. ११४० थिंलागा । पौष कृष्णपक्ष । तिथी– चतुर्दशी, ११ बजेर ७ मिनेट उप्रान्त औंशी । नक्षत्र– ज्येष्ठा,१७ बजेर ६ मिनेट उप्रान्त मूल । योग– गंड,२४ बजेर ३० मिनेट उप्रान्त वृद्धि । करण– शकुनि,११ बजेर ०७ मिनेट उप्रान्त चतुष्पद,२२ बजेर ४५ मिनेट उप्रान्त नाग । आनन्दादिमा ध्वांक्ष योग । चन्द्रराशि–वृश्चिक,१७ बजेर ६ मिनेट उप्रान्त धनु । काठमाडौंमा सूर्योदय ६ बजेर ५३ मिनेटमा, सूर्यास्त १७ बजेर १३ मिनेटमा । दिनमान २५ घडी ४९ पला । दर्श श्राद्ध। क्रिसमस डे। निशी बार्ने औंसी।

आजको राशिफल

मेष (चू,चे,चो,ला,लि,लू,ले,लो,अ) : व्यस्तता बढेपनि स्वास्थ्यको ख्याल नगर्दा कमजोरी महसुस हुनेछ । खानपान तथा बाहिरी वातावरणको ध्यान दिनुहोला । व्यापार व्यवसायमा लगानी गर्नुपूर्व आवश्यक तयारी राम्रोसँग गर्नुहोला । पढाइलेखाइमा मन नजाँदा भनेजस्तो नतिजा नआउन सक्छ । प्रेममा रमाउन चाहानेहरुका लागि आजको दिन मध्यम रहेको छ । गोप्यता भङ्ग हुने तथा आफन्तसँग विवाद बढ्नेछ ।

वृष (ई,ऊ,ए,ओ,वा,वी,वू,वे,वो) : व्यापार लगानी गरी मनग्गे धन आर्जन गर्न सकिनेछ, भने साझेदारी व्यवसायबाट मनग्गे धन कमाउन सकिनेछ । व्यापारकै सिलसिलामा लामो दूरीको यात्राको तय हुनेछ । भौतिक सम्पत्ति तथा विलाशी सामान उपहारको रुपमा प्राप्त हुनेछ । पढाइलेखाइमा प्रतिस्पर्धी आफै किनारा लाग्नेछन् । माया प्रेमको डोरी कसिलो भएर जानेछ । नोकरीमा प्रवेश तथा पदोन्नतिको गतिलो योग रहेको छ ।

मिथुन (का,की,कू,घ,ङ,छ,के,को,हा) : कार्यक्षेत्रमा केही विषयमा विवाद भएपनि तपाईको भनाइ तथा रायलाई स्वीकार्दै जाने सहमति जुट्नेछ । न्यायिक निर्णयहरु तपाईको पक्षमा आउनेछ । आफन्त तथा मावली पक्षबाट सहयोग प्राप्त हुनेछ । पढाइलेखाइ सफलताकै मार्गमा अगाडि बढ्नेछ । राज्यबाट पद प्राप्तीको गतिलो योग रहेको छ । तपाईको खुट्टा तान्ने तथा कुरा काट्नेहरु तपाईकै प्रशंसा गर्दै हिँड्नेछन् ।

कर्कट (ही,हू,हे,हो,डा,डी,डु,डे,डो) : समय गतिसँगै चल्न नसक्दा अरुभन्दा पछि परिनेछ । पढाइलेखाइमा मन नजाँदा पुरस्कार तथा प्रशंसापत्र अरुकै हातमा जानेछ । प्रेममा अविश्वास सिर्जना नहोला भन्न सकिन्न । अग्रज तथा गुरुवर्गको सुझावलाई शिरोधार्य गर्दै अगाडि बढ्नुहोला । व्यापारमा लगानी गरे अनुसार प्रतिफल पाउन निकै नै मिहनेत गर्नुपर्नेछ ।

सिंह (मा,मी,मू,मे,मो,टा,टी,टू,टे) : व्यापार व्यवसायमा भनेजस्तो आम्दानी गर्न प्रशस्त समय खर्चिनु पर्नेछ । कृषि तथा सहकारी व्यवसाय भने फस्टाएर जानेछ । स्वास्थ्यको दृष्टिकोणले समय प्रतिकुल रहेको छ । आफन्त तथा आमासँग मनमुटाव सिर्जना हुनेछ भने लामो दूरीको यात्रा तय हुनेछ । प्रेममा एकअर्कालाई विश्वास गर्न नसक्दा टाढिनु पर्ने बाध्यता हुनेछ ।

कन्या (टो,पा,पी,पू,ष,ण,ठ,पे,पो) : न्यायिक निर्णयहरु तपाईकै पक्षमा हुनेछन् भने विवाद तथा प्रतिस्पर्धामा तपाईको नाम अग्रस्थानमा आउनेछ । पढाइ लेखाइमा भनेजस्तो प्रगति गर्न सकिनेछ भने खेलकुद वा पराक्रमी क्रियाकलापमा भाग लिइ नाम तथा दाम दुवै कमाउन सकिनेछ । प्रेमको डोरी कसिलो भएर जानेछ भने जीवनसाथीको सहयोगले राम्रा काम गर्न सकिनेछ । उद्योग तथा व्यापार फस्टाएर जानेछ ।

तुला (रा,री,रु,रे,रो,ता,ती,तू,ते) : बोल्ने कुरामा ध्यान नजाँदा आलोचनाको शिकार भइनेछ । कार्यक्षेत्रमा कुरा काट्ने तथा खुट्टा तान्नेहरु सक्रिय हुनेछन् । खानपानमा ध्यान दिनुहोला । समय मध्यम रहेको छ । कुटुम्ब तथा आफन्तसँग घरायसी कुरामा राय बाझिनेछ । व्यापारमा मन्दि आउनेछ । प्रेममा अविश्वास सिर्जना हुनेछ । गीतसंगीतको क्षेत्रमा लाग्नेहरुका लागि समयले साथ दिनेछ ।

वृश्चिक (तो,ना,नी,नू,ने,नो,या,यी,यू) : राजनीतिकर्मी तथा समाजसेवीहरुले जनताको काम गरी नाम कमाउन सक्नेछन् । नोकरीमा सहकर्मीहरुलाई पछि पार्दै राम्रा काम गरी सम्मान पाउने योग रहेको छ । पढाइलेखाइमा मन जानेछ भने नतिजा आफैतिर ल्याउन सकिनेछ । व्यापारमा लगानी गरी मनग्गे आम्दानी गर्न सकिनेछ भने नयाँ कामको प्रस्ताव आउनेछ ।

धनु (ये,यो,भा,भी,भू,ध,फा,ढा,भे) : समय र कामको तालमेल नमिल्दा अरुभन्दा पछि परिनेछ । अध्ययनमा मन नजानाले नतिजा अरुकै पोल्टोमा पर्नेछ । खानपानमा ध्यान दिनुहोला । स्वास्थ्यमा समस्या आउने तथा औषधी उपचार खर्च बढ्नेछ । बसाइँसराइ तथा लामो दूरीको यात्राको तय हुनेछ । विदेशी लगानीबाट सञ्चालित संस्थामा काम पाइनेछ । प्रेमका कोपिलाहरु फक्रन नपाउँदै चुडिनेछन् ।

मकर (भो,जा,जी,जू,जे,जो,ख,खी,खू,खे,खो,गा,गी) : व्यापार व्यवसाय फस्टाएर जाने हुनाले प्रशस्त आम्दानी हुनेछ । बौद्धिक कार्यमा सहभागी हुने अवसर प्राप्त हुनेछ भने भनेजस्तो पारिश्रमिक पाउँदा मन प्रशन्न हुनेछ । शिक्षामा भनेजस्तो नतिजा हात पार्न सकिने हुँदा गुरुवर्ग तथा आफन्तहरु खुशी हुनेछन् । दाजुभाई तथा अग्रजहरुको सहयोग पाइनाले नयाँ काम गर्न सकिनेछ । प्रेममा रमाउन चाहनेहरुका लागि समय उत्तम रहेको छ ।

कुम्भ (गू,गे,गो,सा,सी,सू,से,सो,दा) : नयाँ काम पाउने तथा गरिरहेको काममा बढुवा वा स्थानान्तरणको गतिलो सम्भावना रहेको छ । व्यवसाय फस्टाएर जानेछ भने लगानीको अवसर जुट्नेछ । सरकारी तथा प्रशासनिक काममा तपाईको गतिलो उपस्थिति रहनेछ । कृषि तथा पशुपालन व्यवसायबाट मनग्गे धनआर्जन गर्न सकिनेछ । पढाइलेखाइमा मन जानेछ भने अध्ययनकै सिलसिलामा लामो दूरीको यात्राको तय गर्न सकिनेछ ।

मीन (दी,दू,थ,झ,ञ,दे,दो,चा,ची) : दैनिक काम बीचमै रोक्नुपर्दा आर्थिक भार पर्न सक्छ । व्यापार व्यवसायमा नाफा कमाउन निकै नै समय खर्चिनु पर्नेछ । माया प्रेममा धोका हुनेछ भने आश्वासन बाँड्नेहरु सक्रिय हुनेछन् । खानपानमा ध्यान दिनुहोला स्वास्थ्यमा समस्या आउनेछ । धार्मिक प्रतिष्ठान तथा मन्दिरको यात्रा गरी टिका तथा प्रसाद ग्रहण गर्ने अवसर प्राप्त हुनेछ । पढाइ रोकिन सक्छ ध्यान दिनुहोला ।
तपाईको दिन शुभ रहोस् ।

ज्यो. दुर्गा भण्डारी ।