काठमाडौं । आज मिति २०७६ साल पुष महिनाको २१ गते । सोमबार ।इस्वी संवत २०२० जनवरी ०६ तारिक । शकसंवत् १९४१ । परिधावी संवत्सर । दक्षिणायन । हेमन्त ऋतु । नेपाल संवत ११४० थिंलागा । पौष शुक्लपक्ष । तिथी– एकादशी, २५ बजेर ५३ मिनेट उप्रान्त द्वादशी । नक्षत्र– भरुणी,१२ बजेर ४२ मिनेट उप्रान्त कृतिका । योग– साध्य, २२ बजेर ४४ मिनेट उप्रान्त शुभ । करण– वणिज,१३ बजेर २३ मिनेट उप्रान्त भद्रा, २५ बजेर ५३ मिनेट उप्रान्त बव । आनन्दादिमा चर योग । चन्द्रराशि–मेष,१९ बजेर ०५ मिनेट उप्रान्त बृष । काठमाडौंमा सूर्योदय ६ बजेर ५७ मिनेटमा, सूर्यास्त १७ बजेर २१ मिनेटमा । दिनमान २६ घडी ०० पला । पुत्रदा एकादशीव्रत ।
मेष (चू,चे,चो,ला,लि,लू,ले,लो,अ) ः राजनीति तथा समाजसेवामा जनताको गतिलो समर्थन हुने तथा समयमा काम गर्न सकिने हुनाले इज्जत प्रतिष्ठामा वृद्धि भएर जानेछ । सूचना प्रविधिको प्रयोग गरी नयाँ काम गर्न सकिने हुनाले मनग्ये धन आर्जन गर्न सकिनेछ । पढाइलेखाइका अलावा खेलकुद तथा अन्य क्रियाकलापमा भाग लिइ नाम तथा दाम दुवै कमाउन सकिनेछ । मायाको डोरी कसिलो भएर जानेछ ।
वृष (ई,ऊ,ए,ओ,वा,वी,वू,वे,वो) ः व्यापारमा मन्दी आउने तथा उधारो लानेहरुको संख्या बढ्नेछ । स्वदेशी सामानको व्यापारमा कमी आएपनि विदेशमा उत्पादन भएका सामानको व्यापार बढ्नेछ । पढाइलेखाइमा मन जाने छैन भने नतिजा अरुतिरै जानेछ । प्रेममा धोका तथा अविश्वास बढ्ने योग रहेको छ । काम तथा अवसरको खोजीमा दौडनु पर्नेछ । स्वास्थ्यको ख्याल गर्नुहोला खर्च बढ्न सक्छ ।
मिथुन (का,की,कू,घ,ङ,छ,के,को,हा) ः कार्यक्षेत्रमा आलोचना गर्ने तथा फसाउनेहरु सक्रिय हुनेछन् । व्यापारमा प्रशस्त समय दिएमात्र आम्दानी हुनेछ । अग्रज तथा आफन्तहरुको सहयोगले राम्रो काम गर्ने अवसर गुम्नेछ । पढाइलेखाइमा मन नजाँदा अरुभन्दा पछि परिनेछ । पैत्रिक धनसम्पत्तिको प्रयोग गर्दा ध्यान दिनुहोला । समय मध्यम रहेको छ ।
कर्कट (ही,हू,हे,हो,डा,डी,डु,डे,डो) ः व्यापारबाट राम्रो आम्दानी हुने हुनाले चिताएको काम समयमा सम्पादन हुुनेछ । कृषि तथा सहकारी व्यावसाय फस्टाएर जानेछ । नोकरी पाउने तथा बढुवा हुने योग रहेको छ । भूमि, बाहन तथा पैत्रिक सम्पत्तिमा वृद्धि हुने तथा प्राप्त हुनेछ । आफ्नै मिहिनेतले जीवनशैलीमा सुधार ल्याउन सकिनेछ । माता पिताको सहयोग तथा समर्थनले कीर्तिमानी काम गर्न सकिनेछ । अध्ययनमा मन जाने हुनाले नतिजा आफैतिर ल्याउन सकिनेछ ।
सिंह (मा,मी,मू,मे,मो,टा,टी,टू,टे) ः व्यापारमा लगानी गरी मनग्ये धन आर्जन गर्न सकिनेछ । समयले साथ दिने हुनाले सानो प्रयत्नले परिणाममुखी काम गर्न सकिनेछ । धार्मिक तथा आध्यात्मिक क्षेत्रमा रुचि बढ्नेछ । खोज तथा अनुसन्धानको क्षेत्रमा भनेजस्तो नतिजा हात पार्न सकिनेछ । प्रेममा रमाउन चाहनेहरुका लागि समय उत्तम रहेको छ । आत्मविश्वास बढ्ने हुनाले लक्ष्य पहिल्याउन सकिनेछ ।
कन्या (टो,पा,पी,पू,ष,ण,ठ,पे,पो) ः संकट व्यावस्थापनमा चालिएका कदमहरु निरर्थक हुनेछन् । गोप्य योजनाहरु बाहिरिन सक्छ ध्यान दिनुहोला । आफन्त तथा दिदिबहिनीहरुले पनि सहयोग गर्ने छैनन् । अल्छी गर्ने बानीले काम बाँकी रहनेछ भने शरीर स्वास्थ्य नहुनाले आलस्यता बढेर जानेछ । व्यापारमा लगानी गरिहाल्ने समय नरहेकोले केही समय पर्खनु नै राम्रो हुनेछ ।
तुला (रा,री,रु,रे,रो,ता,ती,तू,ते) ः व्यापारमा साझेदारहरु बीच मनमुटाव बढ्ने हुनाले संयम भएर प्रस्तुत हुनुहोला । आर्थिक कारोबार बिग्रनाले दैनिकी प्रभावित हुनेछ । व्यावसायिक यात्रा भएपनि गन्तव्य पहिल्याउन मुस्किल पर्नेछ । अध्ययनमा मन नजाँदा अरुभन्दा पछि परिनेछ । भौतिक तथा विलाशी वस्तुको प्रयोग गर्दा ध्यान दिनुहोला अप्रिय घटना नहोला भन्न सकिन्न ।
वृश्चिक (तो,ना,नी,नू,ने,नो,या,यी,यू) ः प्रतिस्पर्धामा प्रतिस्पर्धीहरुलाई किनार लगाउँदै नतिजा आफैतिर ल्याउन सकिनेछ । लामो समयदेखि रोकिएर बसेका कामहरु बन्नाले मन उत्साहित हुनेछ । शत्रु परास्त हुने तथा न्यायिक निर्णयहरु तपाईकै पक्षमा आउनेछ । स्रोतसाधन जुटाउँदै व्यापारमा लगानी गरी मनग्ये धन आर्जन गर्न सकिनेछ । प्रेम तथा मित्रताको बन्धन कसिलो भएर जानेछ ।
धनु (ये,यो,भा,भी,भू,ध,फा,ढा,भे) ः पढाइलेखाइमा मन जाने तथा भनेजस्तो नतिजा हात पार्न सकिनेछ । माया प्रेमको डोरो कसिलो हुनेछ भने विभिन्न वस्तु तथा उपहार प्राप्त हुनेछ । व्यावसायकै सवालमा रमाइलो यात्रा गर्न सकिनेछ । आफन्त तथा सन्तानको प्रगतिमा मन रमाउनेछ । बौद्धिक तथा प्राज्ञिक क्षेत्र फराकिलो हुनेछ भने तपाईको प्रस्तुतिले सबैको मन आकर्षित गर्नेछ ।
मकर (भो,जा,जी,जू,जे,जो,ख,खी,खू,खे,खो,गा,गी) ः राजनीति तथा समाजसेवामा समय लगानी गर्दै हुनुहुन्छ जनताको काम गर्न नसक्दा आलोचना सुन्नुपर्नेछ । अन्य व्यापार व्यावसायमा मन्दी आएपनि घरजग्गा तथा सवारीसाधनको कारोबारबाट मनग्ये धन आर्जन गर्न सकिनेछ । आमाको स्वास्थ्यमा समस्या आइ औषधी उपचार खर्च बढ्नेछ । प्रेममा आजको दिन नजिक नहुँदा नै राम्रो हुनेछ ।
कुम्भ (गू,गे,गो,सा,सी,सू,से,सो,दा) ः पढाइलेखाइमा मन जाने हुनाले सफलता हात पार्न सकिनेछ । छोटो दूरीको आन्तरिक यात्रा तय गर्न सकिनेछ । दाजुभाइबाट सहयोग पाइने हुनाले आँट तथा साहस गरी लगानी बढाउन सकिनेछ । माया प्रेममा नजिक हुने समय रहेको छ । सकारात्मक सोचको माध्यमबाट रुढीवादी परम्परालाई चिरफार गर्न सकिनेछ । लेखनकलाको माध्यमबाट अन्धविश्वासलाई चिर्दै समाज रुपान्तरण गर्नमा तपाईको सक्रिय भूमिका रहनेछ ।
मीन (दी,दू,थ,झ,ञ,दे,दो,चा,ची) ः तपाईले सुरु गरेको काममा आफन्त तथा कुटुम्बको सहयोग प्राप्त हुनेछ । पारिवारिक माहोलमा दिन बित्नेछ भने मिष्ठान्न भोजन ग्रहण गर्ने अवसर जुर्नेछ । बोलीको प्रभाव बढ्ने हुनाले बोलेरै धेरै काम गर्न सकिनेछ । पढाइलेखाइमा प्रतिस्पर्धीहरुलाई किनारा लगाउँदै नतिजा आफैतिर ल्याउन सकिनेछ । माया प्रेममा शंका उपशंकाहरु हट्दै जानेछ ।
तपाईको दिन शुभ रहोस् ।
ज्यो. दुर्गा भण्डारी
यो खबर पढेर तपाईलाई कस्तो महसुस भयो ?
प्रतिक्रिया