चराजस्तै उड्ने दिनेशले राखे चौथो विश्व कीर्तिमानी

लोकपथ संवाददाता

२०७६,पुष,२१,सोमवार १६:१९

काठमाडौं । भ्रमण वर्ष २०२० लाई लक्षित गरी अन्तर्राष्ट्रिय पार्कर खेलाडी दिनेश सुनारले अमेरिकामा पार्कर खेल मार्फत चौथोपटक विश्व कीर्तिमान राखेका छन् । ब्यालेन्स ग्रुप अफ कम्पनीज प्रालिको आयोजनामा भएको उक्त कार्यक्रममा दिनेशले आफ्नो चौथो कीर्तिमानी सफलतापूर्वक पूरा गरेका हुन् ।

रेकर्ड पूरा गरेको एक हप्तापछि प्रमाणपत्र आउने र प्रमाणपत्र साथै सम्मानपत्र हस्तान्तरणको कार्यक्रम नासो, एनआरएनए, बिएएनए र ब्यालेन्स मिडियाको संयुक्त आयोजनामा हुने जानकारी सुनारले लोकपथलाई दिए ।

सन् २०४८ सालमा खोटाङको राजापानीमा जन्मिएका दिनेशलाई सानो छँदा गाउँमा पार गरेको उकालीओह्राली, बाख्रा चराउन जाँदा छिचोलेको गोरेटो र ढिस्कोहरुले नै यस खेलप्रति गहिरो रुचि जगायो । त्यसवेला उनलाई ‘जिमिनास्टिक’खेलको बारेमा ज्ञान थिएन । आफूले गरिरहेको संघर्षले एकदिन विश्वव्यापी ख्याति कमाउँछ भन्ने पनि थाहा थिएन । उनको कलाको पहिचान गरेर खेलप्रति प्रोत्साहन गर्ने काम गरे तत्कालीन सशस्त्र प्रहरी महानिरीक्षक सनदकुमार बस्नेतले ।

त्यसपछि उनले तीन पटकसम्म विश्व कीर्तिमानी राखे । पहिलो किर्तिमानी ‘मस्ट ट्विस्टिङ ब्याक फ्लिप्स अफ द वाल इन वन मिनट’ मा, दोस्रो कीर्तिमानी ‘दि मस्ट ब्याकवार्ड समरसल्ट वाल इन ३० सेकेन्ड’ मा र आफ्नो दोस्रो कीर्तिमानीलाई तोड्दै ‘द मस्ट ब्याकफूल ३६० वाल इन ३० सेकेन्ड’ को तेस्रो कीर्तिमानी राखिसकेका छन् सुनारले । अहिले उनको खातामा नयाँ कीर्तिमानी थपिएको छ, ‘दि मस्ट ब्याकवार्ड समरसल्ट अगेन्स्ट ट्राम्पोलिन इन एन आवर’ को । उनले ट्राम्पोलिनमा १ घण्टामा ४ सय ६० पटक ब्याकवार्ड समरसल्ट हानेर नयाँ कीर्तिमानी बनाएका हुन् ।

खेलको विधामा ४ पटकसम्म विश्व कीर्तिमानी राख्ने आफू मात्रै भएको उनले बताए ।

निकै वर्ष सशस्त्र प्रहरी बलमा रही सेवा पु-याएका दिनेशले अहिले जागिरबाट राजीनामा छन् । अब उनको पूरै ध्यान खेलप्रति नै केन्द्रित रहने बताउँछन् उनी । खेलमार्फत् नै देशलाई अन्तर्राष्ट्रिय मञ्चमा पहिचान दिलाउन उनी एक प्रसिद्ध अमेरिकी रियालिटी शो अमेरिकाज् गट् ट्यालेन्टमा प्रतिस्पर्धाका लागि छनोट भएर उनी उक्त प्रतियोगितामा भाग लिन अमेरिका पुगेका छन् ।

सुनारले हवल्दार सुन्तली, हँसिया, किस्मत २ जस्ता नेपाली फिल्ममास्टन्ट म्यानको भूुमिका पनि निर्वाह गरिसकेका छन् ।