तपाईको लागि माघ महिना कति शुभ, कति अशुभ ? राशिफल हेर्नुहोस्

मेष (चू ,चे, चो, ला, लि, लू, ले, लो, अ) राज्य भावमा गोचर गर्ने सूर्यको प्रभावले राजनीति तथा समाजसेवामा समय लगानी गर्नेहरुले राज्यबाट लाभ तथा सम्मान पाउँने समय रहेको छ । नोकरीमा पदोन्नती तथा व्यापार व्यवसायमा बढोत्तरी हुँने गतिलो सम्भावना रहेको छ । लामो समयदेखि थाति रहेका काम तथा मुद्दाहरु किनारा लाग्नेछन् । प्राकृतिक स्रोत तथा साधनको भरपुर प्रयोग गरेर प्रशस्त धन तथा सम्पत्ति कमाउँन सकिनेछ । शुभ तथा मांगलिक सभा समारोहमा सहभागी भई स्वादिष्ट भोजन गर्ने अवसर जुर्नेछ । महिनाभर नै शुक्रको अनुकुल प्रभावल पैत्रिक धन तथा भौतिक सम्पत्ति हातलागी हुने योग रहेको छ । विपरित लिङग तथा साथीसंगतले फाइदा हुने तथा विलासी सामान प्रयोग गर्न पाइने हुनाले मन प्रशन्न रहनेछ । विद्यार्थीवर्गहरुले विद्या तथा प्रतिस्पर्धामा प्रतिस्पर्धीहरुलाई हराउँदै नतिजा आफ्नो पक्षमा पार्न सक्नेछन् । महिनाको अन्ततिर खर्च बढेता पनि व्यापार व्यवसायमा समय दिनेहरुले प्रसस्त आम्दानी गर्न सक्नेछन् । महिनाभर नै अष्टम भावमा गोचर गर्ने मंगलले लट्री तथा चिठ्ठा पर्ने सम्भावना हुने तथा यदाकदा दुर्घटना नहोला भन्न सकिन्न ।

वृष (ई,ऊ,ए,ओ, वा, वी, वू, वे, वो) उच्च पदस्थ व्यक्तित्वसँग भेटघाट हुने तथा मान सम्मान, ईज्जत, प्रतिष्ठा बढेर जानेछ । पदीय दायित्व बढ्नेछ भने निर्णय क्षमताको विकास हुनेछ । प्रशासनिक क्षेत्रमा तपाईको वर्चश्व कायम रहने छ । राज्यसँग नजिक रहेर गरिने प्रत्येक काममा सफलता हात लाग्नेछ । यो महिना नयाँ काम पाउने तथा नोकरीमा बढुवा हुँने प्रशस्त सम्भावना रहेको छ । व्यापार व्यवसायमा समय लगानी गर्नेहरुले नयाँ नयाँ ठाउँमा लगानी गरि प्रशस्त नाफा कमाउँन सक्नेछन् । प्रेम तथा मित्रताको बन्धन कसिलो भएर जाने तथा सुयोग्य बर बधुको लगन गाँठो बाँधिने गतिलो सम्भावना रहेको छ । पारिवारिक जमघटमा सहभागी भई मिष्ठान्न भोजन ग्रहण गर्ने अवसर मिल्नेछ । बौद्धिक कार्यमा सहभागी भई आफ्नो गतिलो प्रस्तुति पस्कने अवसर प्राप्त हुनेछ भने पढाइ लेखाइ तथा खोज अनुसन्धानको क्षेत्रमा राम्रो प्रगति गर्न सकिनेछ । लामो दूरीको धार्मिक तथा शैक्षिक यात्राको योग रहेको छ । महिनाभरी नै व्यापार तथा कष्ट भावमा गोचर गर्ने मंगलले साझेदारी व्यवसायमा मनमुटाव सिर्जना हुने तथा भौतिक सम्पत्ति क्षति हुने प्रसस्त सम्भावना रहेको छ ।

मिथुन (का, की, कू ,घ, ङ, छ ,के,को,हा) मिथुन राशि हुनेहरुका लागी यो महिना मध्यम फल प्राप्त हुनेछ । माघको दोस्रो सातासम्को समय राम्रो रहेकोले व्यापार व्यवसायमा लगानी गरी मनग्ये धन आर्जन गर्न सकिनेछ । चिठ्ठा पर्ने तथा नसोचेको धन तथा सम्पत्ति हात पार्न सकिनेछ । शत्रु परास्त हुनेछन् भने व्यायिक निर्णयहरु तपाईकै पक्षमा आउनेछन् । खनिज पदार्थको कारोबार फस्टाएर जानेछ । लेखक तथा साहित्यको क्षेत्रमा रुची बढ्ने तथा लामो दूरीको शैक्षिक यात्रा हुनेछ । महिनाको दोस्रो साताबाट समय मध्यम रहेकोले राजनीतिक तथा सामाजिक प्रभाव कमजोर रहने तथा प्रशासनिक क्षेत्रमा बसेकाहरुले समयमा काम नगर्दिनाले विभिन्न अवसरहरु गुम्न सक्छ । समयमा काम नबन्ने तथा ऋण लाग्ने हुनाले मानसिक तनाव बढ्नेछ । हतियार, फलाम तथा आगोसँग सम्बन्धित काम गर्दा वा प्रयोग गर्दा हासियारी अपनाउँनुहोला चोटपटक लाग्न तथा दुर्घटना हुन सक्छ । स्वास्थ्यमा विशेष गरी हाडजोर्नि, मुटु, आँखा तथा दाँतमा समस्या देखिने हुदा उपचार खर्च बढेर जानेछ । तर पनि महिनाभरनै प्रतिस्पर्धा भावमा गोचर गर्ने मंगलले शुभ संकेतहरु दिनेछ ।

कर्कट (ही, हू ,हे, हो, डा, डी, डु, डे, डो) यो महिना मिश्रित फल पाइने छ । महिनाको दोस्रो सातासम्म ग्रहहरुको अनुकुल प्रभावले विलाशी तथा भौतिक वस्तुको किनमेलमा खर्च बढेपनि मनपर्ने भौतिक साधन, सवारी आदि जोड्ने समय छ। व्यवसायमा नयाँ लगानी बढाइ मनग्ये धन आर्जन हुनेछ । माया प्रेमको बन्धन प्रगाढ हुनेछ। लामो समयदेखिको प्रेमसम्बन्धले वैवाहिक मार्ग अवलम्बन गर्ने समय छ । नयाँ फेसेनेवल तथा विलाशिताका सामानहरु प्रयोग गरी अरुको मन आफुतिर आकर्षित गर्न सकिनेछ । दाजुभाईबाट भनेजस्तो सहयोग पाईने हुँदा विलासी तथा फेसेनेवल वस्तुहरुको व्यापारमा लगानी गर्न सकिनेछ । लामो दूरीको शैक्षिक तथा धार्मिक यात्राको गतिलो सम्भावना रहेको छ । महिनाको दोस्रो साताबाट तपाई आफ्नै कारणले घर परिवारमा तथा पति पत्नि विच मनमुटाव बढ्नेछ । स्वास्थ्य सम्बन्धि समस्याले पिरोल्ने छ भने दाँत, मेरुदण्ड, हाडजोर्नी तथा प्रेसर हाई, लो हुने समस्या आउँन सक्छ, ध्यान दिनुहोला । ऋण, रोग तथा संकटको सामना गर्नुपर्नेछ । राजनीति तथा समाजसेवामा जनताको काम गर्दा गर्दै आलोचनाको शिकार हुनुपर्दा मन खिन्न हुनेछ । निर्णायक पदमा हुनुहुन्छ भने कुनै पनि निर्णय गर्दा ध्यान दिनुहोला, गलत व्यक्तिहरुको सल्लाहमा गलत निर्णयहरु हुन सक्छन् ।

सिंह (मा, मी, मू , मे, मो, टा, टी, टू ,टे) महिना उत्तम रहनेछ । व्यापार व्यवासायमा लगानी गरी मनग्ये धन उपार्जन गर्न सकिनेछ । चुनौतीका पहाडहरु स्वतः हटेर जानेछन् । सोचेका तथा गरेका काम बन्नाले मन उत्साहीत हुनेछ । नयाँ उत्पादन मुलक व्यवसाय प्रारम्भ गर्ने सकिनेछ । लामो समयदेखि अल्झेर बसेका कामहरु सम्पादन हुनेको साथै आर्थिक समस्या सुल्झनेछ । भौतिक स्रोत साधनहरू जुटाई लगानी बढाउँन सकिनेछ भने भौतिक सम्पत्ति तथा विलासी वस्तुका व्यापार तथा आयात निर्यात गरी आम्दानी बढाउँन सकिनेछ । ईमान्दारिता तथा लगनशीलताले उच्च स्तरको सफलता प्राप्त गर्न सकिनेछ । सामाजिक तथा राजनीतिक कामहरु गरी नाम तथा दाम दुवै कमाउँन सकिनेछ । प्रतिस्पर्धाको दौडमा तपाईको नाम अग्रस्थानमा आउँनेछ भने न्यायालयबाट हुने न्यायिक निर्णयहरु तपाईकै पक्षमा फैसला हुनेछन् । मुद्दा मामिला तथा विविध झमेलाहरूलाई किनारा लगाउँदै नतिजा आफ्नो पक्षमा पार्न सकिनेछ । लेखन तथा साहित्यमा थाती रहेका कामहरु सम्पादन गर्न सकिनेछ । साझेदारी तथा संगोलको सम्पत्तिमा वृद्धि भएर जानेछ ।

कन्या (टो,पा,पी,पू,ष,ण,ठ,पे,पो) कन्या राशि हुनेहरुका लागि यो महिना मिश्रित फल प्राप्त हुनेछ । अवसर आएपनि क्याच गर्न नसक्दा दौडधुप गर्नुपर्ला । खानपान तथा मौसमको ध्यान दिनुहोला, स्वास्थ्यमा समस्या देखापर्नाले सयममा कामहरु गर्न सकिने छैन । भौतिक सम्पत्ति तथा सवारी साधनको प्रयोग गर्दा ध्यान दिनुहोला । व्यापारमा नाफा कमाउन प्रसस्त समय खर्चिनु पर्ला । राजनीति तथा समाजसेवामा जनताको आलोचनात्मक समर्थन पाइनेछ । साथीभाईको गलत संगतले पढाइ लेखाइ बिग्रनेछ, ध्यान दिनुहोला । तरपनि आफन्त तथा शुभचिन्तकहरूको साथ, सहयोग पाइनाले फाइदा उठाउन सकिनेछ । मान्यजन तथा गुरुजनको प्रेरणाले अध्ययन अध्यापनमा हौसला प्राप्त हुनेछ । सन्तान तथा अनुयाइको माध्यमबाट पनि लाभ मिल्नेछ भने सन्तानको प्रगतिमा मन रमाउँनेछ । तर प्रयत्न गर्दा देश–विदेशको शैक्षिक तथा धार्मिक यात्रा गर्न सकिनेछ । लामो समयदेखि अड्किएका काम पुनः प्रारम्भ हुनेछन्। बौद्धिकता प्रदर्शन गरेरै स्वरोजगार तथा आर्थिक रुपमा सवल हुन सकिनेछ । लेखन कलाको विकास हुने तथा मनोरञ्जनात्मक किताबहरु अध्यन गर्ने अवसर प्राप्त हुनेछ । न्यायिक निर्णयहरु तपाईकै पक्षमा हुनेछन् ।

तुला (रा,री,रु,रे,रो,ता,ती,तू,ते) समाजका उच्च पदस्थ व्यक्तिहरुसँग सहकार्य गरी नयाँ नयाँ काम गर्न सकिनेछ । राजनीति तथा समाजसेवामा जनताको भनेजस्तो समर्थन पाइने तथा पद प्राप्तीको गतिलो योग रहेको छ । व्यापारमा लगानी बढाई मनग्ये धन आर्जन गर्न सकिनेछ भने घर जग्गा तथा सवारी साधन प्राप्तिको योग रहेको छ । प्रेम सम्बन्धहरु विवाहमा परिणत गर्न सकिनेछ । कृषि तथा पशुपालन व्यवसायलाई समय अनुसार आधुनिकिकरण गरी आम्दानी बढाउँन सकिनेछ । पैत्रिक धन सम्पत्तिको प्रयोग तथा परिचालन गरि मनग्ये धन आर्जन गर्न सकिनेछ । विद्या तथा प्रतिस्पर्धामा सहभागी हुने विद्यार्थिहरुले आफ्नो पक्षमा नतिजा ल्याएर घर परिवार तथा गुरुवर्गहरुलाई खुसी पार्नेछन् । फेन्सि तथा विलासि सामानको व्यापार व्यवसाय फस्टाएर जाने तथा साथीभाईसँग जमघट भई नँया नयाँ दृष्यहरुको अवलोकन गर्ने अवसर जुर्नेछ । तर पनि आमा, आफन्त तथा आत्मिय मित्रहरुसँग टाढिनु पर्दा मन खिन्न हुनेछ । छाति सम्बन्धि समस्याले सताउँने हुँदा दैनिक काम गर्न गाह्रो महसुस हुनेछ । उच्च रक्तचाप, टाउको दुखाइ वा आँखाको समस्याले सताउन सक्छ ।

वृश्चिक (तो,ना,नी,नू ,ने,नो,या,यी,यू) वादविवाद तथा प्रतिस्पर्धामा प्रतिस्पर्धीहरुलाई हराउँदै अगाडि बढ्न सकिनेछ । न्यायालयबाट हुने न्यायिक सम्पादन तपाईकै पक्षमा हुनेछन् । माया प्रेममा सामिप्यता बढ्नुको साथै पति पत्निबीच मायाको डोरी कसिलो भएर जानेछ । छोटो तथा रमाइलो आन्तरिक यात्रा हुनेछ भने यात्राका क्रममा नयाँ ठाउँहरुको अवलोकन गर्न सकिनेछ । लेखन कलामा सुधार भएर जानेछ भने सामाजिक सञ्जाल तथा सञ्चारको माध्यमबाट आफ्ना विचारहरु जनमानसमा लैजान सकिनेछ । व्यवसायमा राम्रो प्रगति हुन गई आर्थिक सम्वृद्धिको बाटोमा लम्कन सकिनेछ । घरजग्गा तथा सवारी साधनको कारोबार फस्टाएर जानेछ भने आधुनिक कृषि तथा पशुपालन व्यवसाय अवलम्बन गर्ने किसानहरुका लागि राज्यबाट आवश्यक सहयोग प्राप्त हुँनेछ । कारोबारबाट भने जस्तो नाफा कमाउँन सकिनेछ । सेवामुलक सामाजिक संघ संस्थामा सहभागि भई मिष्ठान्न भोजन ग्रहण गर्ने अवसर प्राप्त हुनेछ । खनिज पदार्थ तथा सुन चादीको कारोबार गर्नेहरुका लागी समय उत्तम रहेको छ ।

धनु (ये,यो,भा,भी,भू,ध,फा,ढा,भे) पढाइ लेखाइमा प्रतिस्पर्धीहरुलाई हराउँदै नतिजा आफ्नो पोल्टामा पार्न सकिनेछ । सुन्दर तथा विलासी वस्तुहरुको प्रयोगमार्फत् अरुको मन आफुतिर लोभ्याउँन सकिनेछ । उत्तम वस्त्र, मनपर्ने भोजन तथा विशेष उपहार प्राप्तिको योग रहेको छ । विभिन्न अवसरले पछ्याउँनेछन् भने चाहेको समयमा कामहरु सम्पन्न हुने हुँदा आफन्तहरु खुसी हुनेछन् । प्रेम तथा मित्रताको बन्धन कसिलो भएर जाने तथा दाम्पत्य जीवन सुखी रहनेछ । साताको दोस्रो हप्ताबाट समय मध्यम रहेकोले राजनीति तथा समाजसेवामा जनताको साथ तथा समर्थन पाउन निकै नै समय खर्चनु पर्नेछ । समय र परिस्थितिको राम्रोसँग अध्ययन गरेर मात्र आफ्ना कुरा राख्नुहोला तपाईको प्रस्तुति सहि ठाउँमा नहुन पनि सक्छ । निर्णायक पदमा हुनुहुन्छ, भने कुनै पनि निर्णय गर्दा ध्यान दिनु जरुरी देखिन्छ । दात तथा आखाँ सम्बन्धि समस्या आउन सक्छ, ध्यान दिनुहोला ।

मकर (भो,जा,जी,जू,जे,जो, ख, खी, खू,खे, खो,गा,गी) दाजुभाई तथा आफन्तबाट भनेजस्तो सहयोग पाइने हुदा मन प्रफुल्तिल हुनेछ । खनिज पदार्थ, प्राकृतिक स्रोत साधन, हार्डवेयर, फेन्सी जस्ता सामानको व्यापारमार्फत् आम्दानी बढाउँन सकिनेछ । पहिलो भावमा गोचर गर्ने सूर्यले राजनीति तथा सामाजिक विषयमा जनताको गतिलो समर्थन पाईन तथा पद प्राप्तीको योग रहेको छ । प्रेममा रमाउँन चाहनेहरुका लागि समय उत्तम रहेकोले आफ्नो मित्रतालाई विवाह मार्फत बैधानिकता दिन सकिनेछ । अध्ययन तथा कामको लागी लामो दूरीको यात्रा हुनेछ । दोस्रो साताबाट समय मध्यम रहेकोले राम्रो काम गर्दा गर्दै गलत आक्षेप लगाउनेहरु हावी हुनेछन् भने कार्यक्षेत्रमा तपाईको आलोचना गर्नेहरु सक्रिय हुनेछन् । समस्या समाधानका लागि चालिएका कदमहरु निअर्थक हुनेछन् भने तपाई आफ्नै कमजोरीले आत्मिय साथी तथा ईष्टमित्रहरु टाढिन सक्छन् । व्यापार व्यवसायमा बढी नै संघर्ष गर्नु पर्नेछ भने आर्थिक अभावले कामहरु रोकिनेछन् । विलासी सामानको प्रयोग गर्दा ध्यान दिनुहोला नराम्रा घटनाहरु घट्न सक्छन् । उच्च रक्तचाप, आँखा तथा टाउको दुखाइको समस्या भएका हरुले विशेष गरी सावधानी अपनाउँनु पर्नेछ ।

कुम्भ (गू ,गे,गो,सा,सी,सू,से,सो,दा) धार्मिक तथा सामाजिक काममा खर्च बढ्नेछ । उपयुक्त ठाउँमा श्रम शक्ति खर्च हुनाले उपलब्धि हासिल गर्न सकिनेछ । आफन्त तथा घर परिवारका मानिससँग मन मिल्ने हुनाले दैनिक कामहरु समयमा नै सम्पादन हुनेछन्, भने मान्यजनहरुको सुझावलाई हुबहु लागु गरेर अगाडी बढू फाईदा हुने देखिन्छ । लामो दूरीको धार्मिक तथा शैक्षिक यात्राको प्रशस्त सम्भावना रहेको छ । विदेशी भूमिमा बसेर गरिने लगानी कामबाट मनग्ये आम्दानी हुनेछ । घर परिवारमा अनावस्यक भ्रम पैदा गरी झैँ झगडा गराउँन आफन्तहरु लागि पर्नेछन् । विदेशी नियोग, पराराष्ट्र, तथा राजनीतिमा विदेशी विभागको जिम्मा लिएकाहरुले फाइदा लिन सक्नेछन् । तर पनि खर्च भावमा गोचर गर्ने सूर्यले स्वास्थ्य सम्बन्धि सामान्य समस्याले सताउनेछ भने शरिरमा आलश्यता तथा अल्छिपना बढेर जानेछ । साथीभाई तथा आफन्तको गलत सल्लाहले कामहरु बिग्रने हुँदा अरुको सल्लाह लिदै निर्णय आफैँ गर्नुहोला ।

मीन (दी,दू ,थ,झ,ञ,दे,दो,चा,ची) राजनीति तथा समाजसेवामा जनताको साथ तथा समर्थन प्राप्त हुँने हुँदा पद प्राप्तिको योग रहेको छ । सरकारी धन सम्पत्ति तथा प्राकृतिक स्रोत साधनको प्रयोगमार्फत् आम्दानीका स्रोतहरु फराकिला पार्न सकिनेछ । विद्या तथा प्रतिस्र्धामा विजय हुँने योग रहेको छ भने नयाँ ज्ञान हासिल हुनेछ । बुवा वा बुवासरहका मानिसको आशिर्वाद तथा सहयोगले महत्वपुर्ण कामहरु सम्पादन हुनेछन् । माया प्रेममा नजिक भई आफ्ना कुराहरु दिल खोलेर राख्न सकिनेछ । उच्च मनोबलका साथ काम गर्न सकिने हुँदा ईच्छा आकाक्षा तथा मनोकामना पुरा हुने समय रहेको छ । लामो दूरीको धार्मिक तथा शैक्षिक यात्राको प्रशस्त सम्भावना रहेको छ भने नयाँ कुराको खोज तथा अनुसन्धानमा महिना व्यतित गर्न सकिनेछ । आफ्नो पहिचान तथा परम्पराको जगेर्ना गर्ने कामका समय लगानी गर्दा सम्मान पाइनेछ । जीवनसाथीको सहयोगले महत्वपुर्ण कामहरु फत्ते गर्न सकिने हुँदा आर्थिक रुपमा सम्पन्न होइनेछ ।

तपाईको माघ महिना शुभ रहोस् ।
ज्यो दुर्गा भण्डारी ।