काठमाडौं । आज मिति २०७६ साल माघ महिनाको ७ गते मंगलबार । तदनुसार इस्वी संवत २०२० जनवरी २१ तारिक । शकसंवत् १९४१ । परिधावी संवत्सर । उत्तरायन । हेमन्त ऋतु । नेपाल संवत ११४० पोहेलागा । माघ कृष्णपक्ष । तिथी– द्वादशी,२६ बजेर ४० मिनेट उप्रान्त त्रयोदशी । नक्षत्र– ज्येष्ठा,२५ बजेर १ मिनेट उप्रान्त मूल । योग– वृद्धि,०८ बजेर १३ मिनेट उप्रान्त ध्रुव । करण– कौलव,१५ बजेर ८ मिनेट उप्रान्त तैतिल,२६ बजेर ४० मिनेट उप्रान्त गर । आनन्दादिमा मुद्गर योग । चन्द्रराशि– वृश्चिक,२५ बजेर १ मिनेट उप्रान्त धनु । काठमाडौंमा सूर्योदय ६ बजेर ५७ मिनेटमा, सूर्यास्त १७ बजेर ३३ मिनेटमा । दिनमान २६ घडी ३१ पला ।
मेष (चू,चे,चो,ला,लि,लू,ले,लो,अ) ः खानपान तथा मौसमको ध्यान दिनुहोला, स्वास्थ्यमा समस्या आउँन सक्छ । भौतिक सम्पत्ति तथा औजारको प्रयोग गर्दा ध्यान दिनुहोला, अप्रिय घटना नहोला भन्न सकिन्न । आफन्त तथा दिदिबहिनीसँग मनमुटाव बढ्नेछ । अध्ययनमा नतिजा हात पार्नको लागि बढीनै समय खर्चनु पर्नेछ । खर्च बढ्नाले दैनिकी प्रभावित हुनेछ । प्रेममा अविश्वास बढ्नेछ ।
वृष (ई,ऊ,ए,ओ,वा,वी,वू,वे,वो) ः व्यापारको सिलसिलामा लामो दूरीको यात्राको अधिक सम्भावना रहेको छ, भने व्यवसायमा लगानी गरी प्रशस्त नाफा कमाउँन सकिनेछ । भौतिक साधनहरु जुट्नेछन् । प्रविधिको प्रयोग मार्फत मनग्ये धन आर्जन गर्न सकिनेछ । अध्ययन, लेखन, कला, साहित्य तथा गीत संगीतमा चासो बढ्नेछ भने तपाईको प्रतिभाको उच्च कदर हुनेछ । प्रेम सम्बन्धमा विश्वासको वातावरण बढ्ने तथा दाम्पत्य जीवन सुमधुर बन्नेछ भने जीवन साथीको सहयोगले राम्रा काम गर्न सकिनेछ ।
मिथुन (का,की,कू,घ,ङ,छ,के,को,हा) ः न्यायिक निर्णयहरु आफ्नो पक्षमा पार्न सकिनेछ भने शत्रु परास्त हुनेछन् । विद्या तथा प्रतिस्पर्धामा तपाईको नाम अग्र स्थानमा आउँनेछ । प्रेममा रमाउँन चाहनेहरुका लागि समयले साथ दिनेछ । व्यापारमा लगानी गरी दिगो फाईदा हुने कार्य शुभारम्भ आरम्भ गर्न सकिनेछ । पुराना थाति रहेका कामहरु सम्पादन हुनेछन् ।
कर्कट (ही,हू,हे,हो,डा,डी,डु,डे,डो) ः अध्ययनमा भनेजस्तो उपलव्धि हासिल गर्न सकिनेछ, भने अध्ययनकै सवालमा लामो दूरीको यात्रा हुनेछ । परिवार तथा सन्तानले व्यापारमा सहयोग गर्ने हुनाले मनग्ये धन आर्जन गर्न सकिनेछ । सेवामुलक काम वा शिक्षा क्षेत्रको कामबाट मनग्ये धन आर्जन गर्न सकिनेछ । प्रेममा रमाउँन चाहनेहरुका लागि समय राम्रो रहेको छ ।
सिंह (मा,मी,मू,मे,मो,टा,टी,टू,टे) ः राजनीति तथा सामाजिक काममा हतारमा निर्णय गर्दा आलोचना हुनेछ । अन्य व्यापार व्यवसायमा मन्दि आउँने भएपनि कृषि तथा पशुपालन व्यवसाय फस्टाएर जानेछ । आफन्त तथा परिवारलाई समय दिन नसक्दा तपाईदेखि रिसाउँनेछन् । प्रेममा एक अर्काको भावना नबुझ्दा टाढिनु पर्ने बाध्यता आउँन सक्छ । अध्ययन तथा अध्यापनबाट भनेजस्तो नतिजा नआउँन सक्छ ।
कन्या (टो,पा,पी,पू,ष,ण,ठ,पे,पो) ः पुरुषार्थि काम गरी नाम दाम तथा ईज्जत प्रतिष्ठा कमाउँन सकिनेछ । खेलकुद तथा पराक्रमी क्रियाकलापमा भाग लिन सकिने तथा देश विदेशको यात्रा गर्न सकिनेछ । दाजुभाई तथा आफन्तसँग मिलेर गरिने व्यापार फस्टाएर जानेछ । शत्रु परास्त हुनेछन् भने न्यायालयबाट हुने न्यायिक निर्णयहरु तपाईकै पक्षमा आउँनेछन् । प्रेममा सामिप्यता बढेर जानेछ ।
तुला (रा,री,रु,रे,रो,ता,ती,तू,ते) रमाईलो यात्रा गर्ने अवसर जुर्ने तथा यात्राका क्रममा मिठो साथीभाईका साथमा मिष्ठान्न भोजन ग्रहण गर्ने अवसर प्राप्त हुनेछ । रमाईलो गर्दा गर्दै पढाइ लेखाइमा समय दिन नसक्दा अरु भन्दापछि परिन सकिन्छ, ध्यान दिनुहोला । बोलिको प्रभाव बढ्ने हुँदा बोलेकै भरमा कामहरु सम्पादन हुनेछन् भने मोटिभेसन, काउन्सेलिङ तथा बोलेर गर्ने व्यवसाय फस्टाएर जानेछ । व्यापार व्यवसायमा समय दिन सके मनग्ये आम्दानी हुनेछ भने भौतिक सम्पत्ति तथा धातु संग्रह गर्न सकिनेछ ।
वृश्चिक (तो,ना,नी,नू,ने,नो,या,यी,यू) ः विशेष अवसरमा आकर्षक उपहार प्राप्त हुनेछ । व्यापार व्यवसायबाट मनग्ये धन आर्जन गर्न सकिनेछ भने नयाँ लगानीको अवसर आउनेछ । ईमान्दारिता र मेहनतले आत्मविश्वासमा वृद्धि हुनेछ । अध्ययनमा भनेजस्तो प्रगति गर्न सकिने हुनाले ज्ञानको भण्डार बढ्नेछ । प्रेममय वातावरणमा समय व्यतित गर्न पाउदा मन हर्सित हुनेछ ।
धनु (ये,यो,भा,भी,भू,ध,फा,ढा,भे) ः पढाइ लेखाइमा मन नजाँदा भनेजस्तो नतिजा हात पर्न सकिने छैन । काम गर्दा वा सवारी चलाउँदा ध्यान दिनुहोला, दण्ड तथा जरिवाना हुन सक्छ । स्वास्थ्यमा समस्या आई खर्च बढ्ने योग रहेको छ । व्यापार व्यवसायमा बढीनै समय दिएमात्र नतिजा हात पार्न सकिनेछ । तापनि विदेशी सामानको खरिद बिक्रिबाट मनग्ये धन आर्जन गर्न सकिनेछ भने विदेश यात्राको गतिलो योग रहेको छ ।
मकर (भो,जा,जी,जू,जे,जो,ख,खी,खू,खे,खो,गा,गी) ः पैत्रिक धन तथा सम्पत्तिको प्रयोग तथा परिचालनमार्फत् मनग् धन सम्पत्ति जोड्न सकिनेछ । बैंक तथा वित्तीय क्षेत्रमा लगानी हुनेहरुका लागि कारोबारमा सुधार हुनेछ । विद्यार्थीहरुका लागि समय राम्रो रहेकोले नतिजा हात पार्न सकिनेछ । ईच्छा, आकांक्षा तथा मनोकामना पुरा हुने समय रहेको छ । पढाइ लेखाइमा भनेजस्तो नतिजा हात पार्न सकिने हुँदा मन प्रशन्न रहने छ ।
कुम्भ (गू,गे,गो,सा,सी,सू,से,सो,दा) ः सामाजिक काम गरि ईज्जत प्रतिष्ठा कमाउँन सकिनेछ । व्यावसायमा लगानीका प्रस्ताव आउने तथा मनग्ये धन आर्जन गर्न सकिने हुनाले जीवनशैलीमा परिवर्तन हुनेछ । पढाइमा मन जानेछ भने पढाइकै सवालवा लामो दूरीको यात्राको तय हुनेछ । माया प्रेमको डोरी कसिलो भएर जानेछ । कृषि तथा पशुपालन क्षेत्रमा लगानी बढाइ आम्दानी पनि बढाउन सकिनेछ ।
मीन (दी,दू,थ,झ,ञ,दे,दो,चा,ची) ः समयको महत्व बुझेर अगाडी बढ्दा चाहेको गन्तव्य भेट्न सकिनेछ । धर्म अध्यात्म तथा सामाजिक परम्परा जस्ता क्षेत्रमा मन जानेछ । प्रशासनिक काममा केहि ढिला सुस्तिको चपेटामा परिए पनि अन्तत काम हुनेछ । खोजीमुलक काममा लामो दूरीको यात्राको तय गर्न सकिनेछ । व्यापार व्यवसायमा केहि मन्दि आएपनि दैनिकि प्रभावित हुनेछैन ।
तपाईको दिन शुभ रहोस् ।
ज्यो दुर्गा भण्डारी ।
यो खबर पढेर तपाईलाई कस्तो महसुस भयो ?
प्रतिक्रिया