काठमाडौं । सरकारले काठमाडौं उपत्यकामा ५ सय १८ बेड क्षमताको क्वारेन्टाइन तयारी अवस्थामा रहेको जनाएको छ । कोरोना संक्रमण भएका शंकास्पद व्यक्तिहरुलाई राख्न उपत्यकामा बनाइएका पाँच क्वारेन्टिन स्थलको अनुगमनपश्चात् सहरी विकास राज्यमन्त्री रामवीर मानन्धरले तत्काल पाँच सय १८ जनालाई एकैपटक राख्न सकिने अवस्था रहेको बताए ।
मन्त्री मानन्धरले उपत्यकामा क्वारेन्टाइन व्यवस्थापनलाई चुस्त बनाउनका लागि अनुगमन गरिएको बताए । साथै सातै प्रदेश तथा ७५३ वटै स्थानीय तहहरुमा रहेका होटल, रिसोर्ट र होमस्टेसमेतलाई क्वारेन्टाइन बनाउन सकिने मन्त्री मानन्धरको तर्क छ । यसो गर्न सकिए दशौं हजार बेड आवश्यक परेपनि तत्काल निर्माण गर्न सकिन्छ । मन्त्री मानन्धरले काठमाडौं उपत्यकामा रहेका ठुला होटलहरुमा सबै सुविधा उपलब्ध हुने भएकाले अब सरकारको ध्यान त्यसतर्फ गएको बताए । मन्त्री मानन्धरका अनुसार पाँच स्थानमा तयारी हालतमा रहेका क्वारेन्टाइनको व्यवस्थापनका लागि आवश्यक हजिकरण गरिएको बताए ।
मन्त्री मानन्धरका अनुसार पशुपतिको धर्मशालामा ७० बेड क्षमताको क्वारेन्टिन तयारी अवस्थामा छ । यस्तै ललितपुरको स्टाफ कलेजमा सय बेड क्षमता रहेको छ । स्टाफ कलेजमा केही सुधार गर्नुपर्ने देखिएको मन्त्री मानन्धरले बताए । यस्तै भक्तपुरको कृषि तालिम केन्द्रमा ७० बेड तयारी अवस्थामा रहेको छ । खरिपाटीमा २०८ र नगरकोट नजिक तेलकोटस्थित खानेपानी तालिम केन्द्रमा ७० बेड क्षमताको क्वारेन्टिन तयारी अवस्थामा रहेको पनि मन्त्री मानन्धरले जानकारी दिए । अनुगमनका क्रममा खरिपाटी र तेलकोटको क्वारेन्टिनमा सबै पुर्वाधार तयारी अवस्थामा रहेको बताउँदै मन्त्री मानन्धरले अन्य स्थानमा पनि सामान्य सुधार गरेर सञ्चालन गर्न सकिने अवस्था रहेको जानकारी दिए ।
मन्त्री मानन्धरले काठमाडौं उपत्यकामा स्थानीय तहहरुले पनि क्वारेन्टिन बनाएको बताउँदै सबै स्थानीय तहले निर्माण गरेका क्वारेन्टिन सञ्चालनको सहजिकरण सरकारले गर्ने बताए ।
मन्त्री मानन्धरले स्थानीय तह तथा अन्य निकायले बनाएको क्वारेन्टिन मापदण्ड पुगे नपुगेकोबारे सरकारले स्थलगत अनुगमन तथा सहजिकरण शुरु गरेका हुन् ।
सरकारले नागरिकको जीवन रक्षाका लागि हर तरहको प्रयास जारी राखेको बताउँदै मन्त्री मानन्धरले सरकारको योजनामा आम नागरिकले साथ दिएको भन्दै खुसी व्यक्त गरे ।
उपत्यकामा गर्नपर्ने तयारीकाबारे प्रतिवेदन बनाउने र देशभर मापदण्ड अनुसारनै क्वारेन्टिन निर्माणमा सहजीकरण थालिने पनि मन्त्री मानन्धरले जानकारी दिए ।
यो खबर पढेर तपाईलाई कस्तो महसुस भयो ?
प्रतिक्रिया