दक्षिण कोरियाका विशेषदूत र उत्तर कोरियाली नेताबीच छलफल

सोल, २२ फागुन । उत्तर कोरिया पुगेका दक्षिण कोरियाली राष्ट्रपतिका विशेषदूत र उत्तर कोरियाका नेता किम जोङ उनबीच भेटवार्ता भएको छ ।पछिल्लो समयमा केही सुधार आएको सम्बन्धलाई उच्चस्तरीय बैठकसम्म पु¥याउने प्रयासस्वरुप दक्षिण कोरियाली राष्ट्रपतिले सोमबार आफ्ना विशेषदूतलाई उत्तर कोरिया पठाएका हुन् ।उत्तर र दक्षिण कोरियाबीच आगामी केही दिनमा वार्ताको वातावरण तयार पार्न विशेषदूत त्यहाँ पुगेका दक्षिण कोरियाले बताएको छ । त्यस्तै उत्तर कोरियाले सो भेटवार्तालाई महत्वपूर्ण भनेको छ ।दक्षिण कोरियाका राष्ट्रपति मुन जाई–इनका विशेषदूतका रूपमा उत्तर कोरिया पुगेका राष्ट्रिय सुरक्षा सल्लाहकार तथा राष्ट्रपतिको कार्यालयका राष्ट्रिय सुरक्षा प्रमुख युइ–योङले उत्तर कोरियाली नेता किम जोङ उनसँग भेटवार्ता गरेका हुन् ।साथै उनी उत्तर कोरियाली नेता किम जोङ उनद्वारा आयोजित रात्रिभोजमा पनि सहभागी भएको दक्षिण कोरियाका राष्ट्रपतिका प्रवक्ता किम इयु क्योमले पत्रकार सम्मेलन गरेर जानकारी गराएका छन् ।उक्त प्रतिनिधिमण्डलले उत्तर कोरियाली नेता किमसँग भेटवार्ता गर्ने कार्यक्रम रहेको थियो । सो कुराको पुष्टी पत्रकार सम्मेलनका क्रममा प्रवक्ता क्योमले गरेका थिए ।प्रतिनिधिमण्डलले उत्तर कोरियाली नेता किमलाई भेटगरी आवश्यक परामर्श गर्नुका साथै पछिल्लो समयमा विकसित भएको सम्बन्ध सुधारका केही कार्यक्रमहरूमा थप बल पु¥याउने काम गर्ने पनि दक्षिण कोरिया सरकारले जनाएको छ ।करिब एक दशकपछि पहिलो पटक उत्तर कोरिया पुगेका यति उच्चतहका अधिकारी र नेता उनबीच उक्त भेटवार्ताका क्रममा दुई कोरियाबीच आगामी दिनमा गर्न लागेको भनिएको उच्चस्तरीय बैठकका बारे कुराकानी भएको बताइएको छ ।के विषयमा कुराकानी भयो भन्ने बारेमा विस्तृत रुपमा नबताइएको भए पनि आसन्न उच्च बैठकका बारेमा उनीहरुबीच कुराकानी भएको उत्तर कोरियाली समाचार समिति, केसिएनएले जनाएको छ ।तर उत्तर कोरियाको समाचार समिति, केसिएनएले सो भ्रमण र भेटवार्ताहरु सकारात्मक रुपमा अघि बढेका जनाएको छ ।त्यस्तै दक्षिण कोरियाली राष्ट्रपतिको कार्यालय ब्ल्यु हाउसले दिएको जानकारीअनुसार सो भेटघाटले आगामी दिनमा यी दुई देशका उच्चस्तरीय अधिकारीबीचको बैठकका लागि वातावरण निर्माण गरेको जनाएको छ ।हालैमात्र पनि उत्तर कोरिया दक्षिण कोरियासँग विनाशर्त वार्ता गर्न इच्छुक रहेको कुरा बाहिर आएको थियो । त्यस विषयमा दक्षिणको पनि सकारात्मक नै प्रतिक्रिया बाहिर आएको थियो ।