आफ्नै बुबाको हत्या गर्ने पक्राउ

गोरखा । आफ्नै बुबाको हत्या गरेको अभियोगमा भुवन ढकाललाई प्रहरीले पक्राउ गरेको छ । सिरानचोक गाउँपालिका ८ धन्सारका ७० वर्षीय तुलाराम ढकालको हत्या गरेको आरोपमा बुधवार साँझ उनका ४० वर्षीय छोरा भुवनलाई पक्राउ गरिएको हो ।

सोही गाउँपालिकाको धापेस्थित खेतमा धान झाट्ने क्रममा झगडा हुँदा भुवनले आफ्नै बुवा तुलारामलाई लाठीले हानी गम्भीर घाइते बनाएका थिए । गम्भीर घाइते भएका तुलारामको प्राथमिक स्वास्थ्य केन्द्र जौबारीमा उपचारको क्रममा मृत्यु भएको हो । खबर प्राप्त हुनासाथ ईलाका प्रहरी कार्यालय जौबारीबाट खटिएको प्रहरी टोलीले भुवनलाई पक्राउ गरेका थिए ।

यस विषयमा प्रहरीले थप अनुसन्धान गरिरहेको छ ।