“राजनीति गर्नु भनेको कमाउनु होइन”- प्रधानमन्त्री ओली

काठमाडौँ– प्रधानमन्त्री केपी शर्मा ओलीले राजनीतिमा देशभक्ति हुनुपर्ने बताएका छन् ।

शुक्रवार काठमाडौंमा नेपाल स्काउटले आयोजना गरेको बालबालिकासँग प्रधानमन्त्री भन्ने कार्यक्रममा राजनीतिबारे बालबालिकाहरुलाई बताउँदै राजनीति फोहोरी खेल बनाइएको पनि बताए । प्रधानमन्त्री ओलीले राजनीति आफैमा फोहोरी खेल नभई राजनीति गर्नेहरुले फोहोरी खेल बनाएको तर्क गरे ।

राजनीति त्याग र निष्ठा पनि रहेको बताउँदै बालबालिकाहरुलाई समय आएपछि राजनीतिमा लाग्न पनि प्रेरित गरे। उनले भने, ‘राजनीति गर्नुभनेको एउटा त्याग गर्नु हो । राजनीति गर्नु भनेको कमाउनु होइन । कतिले भन्ने गरेको सुनेको छु मैले जोगी हुन राजनीति गरेको होइन भन्ने । राजनीति भोगी हुनको लागि गरेको पनि होइन । एक ढंगले् जोगी हुनैका लागि राजनीति गरेको हो । आफू जोगी हुन तयार हुनुपर्छ राजनीति गर्ने मान्छेले र देश बनाउन तयार हुनुपर्छ । त्यो भनेर राजनीति सुन्दाखेरी सबै तर्सिने अवस्था होला । राजनीतिको टुप्पोमा बस्ने मान्छेहरु शाषणको टुप्पोमा बस्ने मान्छेहरु जोगी जस्तै हुनुपर्दछ ।’

नेपाल स्काउटले हरेक वर्ष जनवरी एकका दिन प्रधानमन्त्रीसँग बालबालिका कार्यक्रम गर्दै आएको छ । कार्यक्रममा बालबालिकाहरुले प्रधानमन्त्रीसँग समसामयिक राजनीति, समाज, बालबालिकाको अधिकार र बालबालिका सम्बन्धी सरकारका नीतिहरुका बारेमा प्रश्न सोध्ने गर्दछन् । कार्यक्रममा उपत्यका भित्रका दर्जन बढी विद्यालयका सय भन्दा बढी बालबालिकाहरु सहभागि भएका थिए।