विराटनगरसँग पुलिस पराजित

काठमाडौं । राष्ट्रिय महिला लिग फुटबलमा नेपाल पुलिस क्लब पराजित भएको छ । सातदोबाटोस्थित एन्फा कम्प्लेक्समा बुधवार भएको खेलमा पुलिस विराटनगर महानगरपालिकासँग १-० गोल अन्तरले पराजित भएको हो ।

खेलको नवौं मिनेटमा विराटनगरकी पार्वती घलेले निर्णायक गोल गरेकी थिइन् । यससँगै विराटनगरले लिगमा तेस्रो जित हासिल गरेको छ ।

जितसँगै विराटनगरले ६ खेलबाट १० अंक जोडेको छ । विराटनगर लिगको तेस्रो स्थानमा उक्लिएको छ ।

पुलिसले ६ खेलमा ८ अंक जोडेको छ । पुलिस लिगको चौंथो स्थानमा झरेको छ । लिगमा पुलिसको यो दोस्रो हार हो ।

यस हारसंगै पुलिस उपाधि होडबाट समेत बाहिरिएको छ । पुलिस र विराटनगरबीचको खेलसँगै लिगको पहिलो चरणको खेलहरु सकिएको छ ।

दोस्रो चरणको खेलहरु शनिवारबाट शुरु हुनेछ ।