पेस्तोल बोकेर नेपालतर्फ आँउदै गरेका साह प्रहरीको फन्दामा

काठमाडौं । पर्सामा पेस्तोल सहित एक जना पक्राउ परेका छन् ।

वीरगन्ज महानगरपालिका-२५ सिर्सिया बस्ने रामा साह भन्ने २४ वर्षीय उपेन्द्र साहलाई १ थान कटुवा पेस्तोल सहित बिहीवार राति प्रहरीले पक्राउ गरेको छ ।

भारतबाट नेपालतर्फ बिआर ५ ए एफ ४६४७ नम्बरको मोटरसाइकलमा आइरहेका साहलाई जिल्ला प्रहरी कार्यालयबाट खटिएको प्रहरीले जाँच गर्दा उक्त पेस्तोल फेला पारी मोटरसाइकलसहित पक्राउ गरेको हो ।

यस सम्बन्धमा प्रहरीले थप अनुसन्धान गरिरहेको बताएको छ ।