खुकुरी प्रहार गरी हत्या गर्ने फरार अभियुक्त पक्राउ

काठमाडौं । मोरङमा कर्तव्य ज्यान मुद्दाका फरार अभियुक्त पक्राउ परेका छन् । बेलबारी नगरपालिका-५ कसेनी बस्ने ४० वर्षीय चन्द्र कुमार राईको हत्यामा संलग्न भई फरार रहेका अभियुक्त ग्रामथान गाउँपालिका-४ मोतीपुर बस्ने ३८ वर्षीय ओम नारायण धामीलाई आइतवार राति प्रहरीले पक्राउ गरेको छ ।

गत भदौ १२ गते बेलबारी नगरपालिका-५ कसेनी लोहन्द्रा पुल स्थितमा दुई समूह बिच सामान्य बिबाद हुँदा धारिलो हतियार खुकुरी प्रहारबाट गम्भीर घाइते भएका राईको बिराट मेडिकल कलेज बिराटनगरमा उपचारको क्रममा मृत्यु भएको थियो ।

उक्त घटनामा संलग्न रही हालसम्म फरार रहेका उनलाई जिल्ला प्रहरी कार्यालय मोरङबाट खटिएको प्रहरीले बुढिगंगा गाउँपालिका(२ वाईपासरोडबाट पक्राउ गरेको हो । उनी उपर थप अनुसन्धान भइरहेको जिल्ला प्रहरी कार्यालय मोरङले जनाएको छ ।