नातिनी बलात्कार गर्ने ५६ वृद्धलाई आजीवन कारावास

उदयपुर- आठ वर्षीया नातिनीलाई बलात्कार गरेको आरोपमा पक्राउ परेका ५६ वर्षीय वृद्धलाई जिल्ला अदालतले कसुरदार ठहर गरेको छ । जिल्ला न्यायाधीश माधवप्रसाद सिलुवालको एकल इजलासले त्रियुगा नगरपालिकाका ५६ वर्षीय वृद्धलाई आजीवन कारावाससहित थप चार वर्षको कैद सजायको सुनाएको हो ।

त्यसैगरी, जरिवानाबापत ४० हजार रुपैयां र सरकारले स्थापना गरेको पीडित राहत कोषमा चार हजार चार सय रुपैयां भराउन पनि अदालतले आदेश गरेको स्रेस्तेदार धनबहादुर कार्कीले जानकारी दिए ।

कसुरदारले साउन १२ गते घरमा कोही नभएका बेला पीडितलाई बलात्कार गरेको भन्दै परिवारबाटै भदौ ९ गते जिल्ला प्रहरी कार्यालयमा जाहेरी परेको थियो । तत्काल पक्राउ परेका आरोपितलाई अदालतले असोज २ गते पुर्पक्षका लागि थुनामा राख्न आदेश दिएको थियो ।