बार्सिलोनालाई पछि पार्दै रियल मड्रिड दोस्रो स्थानमा उक्लियो

काठमाडौं । स्पेनिस ला लिगा फुटबलमा रियल मड्रिड दोस्रो स्थानमा उक्लिएको छ । शनिवार राती भएको खेलमा सेल्टा डी भिगोलाई ३.१ गोल अन्तरले हराउँदै रियल दोस्रो स्थानमा उक्लिएको हो । रियललाई जिताउन करिम बेन्जेमाले दुई तथा मार्को असेन्सियोले एक गोल गरे ।

सेल्टाका लागि शान्ति मिनाले एक गोल फर्काए । जितसँगै रियल २८ खेलबाट ६० अंकसहित ला लिगाको दोस्रो स्थानमा उक्लिएको हो । एक खेल कम खेलेको बार्सिलोनाको ५९ अंक छ ।

६३ अंकसहित एथ्लेटिको मड्रिड भने शीर्ष स्थानमा छ । शनिवार राती नै भएको अर्को खेलमा सेभिल्ला र भालाडोलिडले एक–एक गोलको बराबरी खेलेका छन् ।