खुकुरी प्रहार गरी श्रीमतीको हत्या गर्ने श्रीमान प्रहरी नियन्त्रणमा

काठमाडौं । सुनसरीमा धारिलो हतियार प्रहार गरी आफ्नै श्रीमतीको हत्या गर्ने श्रीमान पक्राउ परेका छन् । आफ्नै श्रीमती ३१ वर्षीया कमला माझीलाई धारिलो हतियार खुकुरी प्रहार गरी हत्या गरेको अभियोगमा धरान उपमहानगरपालिका-८ दुर्गा बस्ने ३७ वर्षीय तिल बहादुर माझीलाई बिहीवार साँझ प्रहरीले पक्राउ गरेको हो ।

माझीले आफ्नै श्रीमतीलाई खुकुरी प्रहार गर्दा गम्भीर घाइते भएको भन्ने खबर प्राप्त हुनासाथ ईलाका प्रहरी कार्यालय धरान र अस्थायी प्रहरी चौकी बरगाछिबाट खटिएको प्रहरीले उनलाई नियन्त्रणमा लिएको छ ।

गम्भीर घाइते कमलाको घोपा अस्पताल धरानमा उपचारको क्रममा मृत्यु भएको हो ।

यस सम्बन्धमा प्रहरीले थप अनुसन्धान गरिरहेको बताएको छ ।