मोटरसाइकलको ठक्करबाट एक महिलाको मृत्यु

मोरङ । मोरङको रतुवामाईमा मोटरसाइकलको ठक्करबाट बुधवारसाँझ एक जना वृद्धा महिलाको मृत्यु भएको छ ।

मोरङ प्रहरीका प्रवक्ता डीएसपी मानबहादुर राईका अनुसार मोटरसाइकलको ठक्करबाट रतुवामाई–३ की ६० वर्षीया चिन्तीदेवी ताजपुरीयाको मृत्यु भएको हो ।

रतुवामाई नगरपालिका–३ स्थित भित्री सडक खण्डमा दक्षिणतर्फ जाँदै गरेको मे ११ प ५४५५ नम्बरको मोटरसाइकलले पैदल यात्री महिलालाई ठक्कर दिँदा दुर्घटना भएको हो ।

दुर्घटनामा परेर गम्भीर घाइते भएकी ताजपुरीयालाई रंगेली अस्पतालका चिकित्सकले साँझ ६ः ३० बजेतिर मृत घोषित गरेका हुन् । रतुवामाई नगर अस्पताल झुर्कियामा उपचार हुन नसकेपछि उनलाई थप उपचारका लागि रंगेली लगिएको डीएसपी राईको भनाइ छ ।