काठमाडौं । काठमाडौंको त्रिवि क्रिकेट मैदानमा जारी बजाज पल्सर ट्राई नेसन्स टी २० सिरीजको दोस्रो खेलमा नेदरल्याण्ड्सले मलेसियालाई १५ रनले पराजित गरेको छ।
टस जितेर ब्याटिङ रोजेका नेदरल्याण्ड्सका पीटर सिलारको निर्णय राम्रो सावित हुन पुग्यो। ओपनिङ ब्याट्सम्यान म्याक्स ओ डाउडले कीर्तिमानी पारी खेल्दा नेदरल्याण्ड्सले निर्धारित २० ओभरमा मात्र २ विकेट गुमाएर १९२ रनको विशाल योगफल खडा गर्यो। नेदरल्याण्ड्सको क्रिकेट इतिहासमा पहिलो टी २० आई शतक प्रहार गर्ने ब्याट्सम्यान बने डाउड। उनले ७३ बलमा १३३ रन बनाएर अभिजित रहे। उनले आफ्नो पारीमा १५ चौका र ६ छक्का प्रहार गरे।
जवाफमा ब्याटिङ्ग गर्न आएको मलेसियाको सुरुवात खराब रहन पुग्यो। मात्र २० रन जोड्दा मलेसियाले कप्तान अहमद फैज सहित ३ विकेट गुमाइसकेको थियो। विरन्दीप सिंहले मलेसियाको परीलाई निकै उँभो लगाउने प्रयास गरे। उनले ५३ बलको सामना गर्दै ८७ रनको योगदान गरे। बाँकी ब्याट्सम्यान खासै चल्न नसक्दा मलेसियाले २० ओभरमा ८ विकेट गुमाउँदै मात्र १७६ रन बटुल्न सक्यो।
यस जीत सहित नेदरल्याण्ड्सले अंक तालिकामा आफ्नो खाता खोलेको छ भने, मलेसिया भोलि दिउँसो १ः१५ मा आयोजक राष्ट्र नेपाल सँग त्रिवि क्रिकेट मैदानमा भिड्दै छ।
यो खबर पढेर तपाईलाई कस्तो महसुस भयो ?
प्रतिक्रिया