त्रिकोणात्मक सिरिज : नेपालको शानदार जित

काठमाडौं । ट्राई नेसन्स टी- ट्वान्टी सिरिजको तेस्रो खेलमा नेपालले मलेसियालाई ९ विकेटले पराजित गरेको छ।

टस जितेर बलिङ रोजेको नेपालले मलेसियालाई १६.५ ओभरमा १०९ रनमै अल आउट गरेको थियो । नेपालका लागि करन केसीले ३ ओभरमा १७ रन दिँदै ३ विकेट लिएका थिए । त्यस्तै सन्दीप लामिछानेले २ विकेट निकाल्न सफल भएका थिए ।

मलेसियाका लागि ओपनिङ ब्याट्सम्यान सायद अजीजले सर्वाधिक २७ रनको पारी खेलेका थिए ।

जवाफमा ११० रनको विजय लक्ष्य लिएर ब्याटिङ गर्न आएको नेपालका लागि ओपनर द्वय कुशल भुर्तेल र आसिफ शेखले शानदार शुरुवात दिलाए । पहिलो खेलमा विस्फोटक ब्याटिङ गरेका भुर्तेलले आज पनि आक्रामक ब्याटिङ प्रदर्शन देखाउँदै २६ बल खेलेर अर्धशतक प्रहार गरे। उनको ६१ रनको पारीमा ३ चौका र ५ छक्का जडित छन्। त्यस्तै आसिफले २९ बलमा ४ चौका र १ छक्का प्रहार गर्दै ४२ रन बनाएर पवीलियन फर्केका थिए ।

नेपालले १२.१ ओभरमा नै लक्ष्य पुरा गर्दै जित आफ्नो हातमा पार्न सफल भएको हो । यस जीत सँगै नेपालको फाइनलको यात्रा सरल देखिएको छ।

नेपालले अब आफ्नो तेस्रो खेल भोलि अपरान्ह १ः१५ बजे त्रिभुवन बीस्वविद्यालय क्रिकेट मैदानमा नेदरल्याण्ड्स विरुद्ध खेल्ने छ। यस अघि नेपालले नेदरल्याण्ड्स विरुद्धको खेलमा ९ विकेटले नै जीत हासिल गरेको थियो।