आईपीएल २०२१ : राजस्थान रोयल्सद्वारा कोलकाता नाइट राइडर्स पराजित

काठमाडौं । इन्डियन प्रिमियर लिग अन्तर्गत शनिवार राती खेलिएको खेलमा राजस्थान रोयल्सले कोलकाता नाइट राइडर्सलाई ६ विकेटले पराजित गरेको छ ।

अंक तालिकाको पुच्छरमा रहेका दुई टोली बिच प्रतिस्पर्धा हुँदा राजस्थानले बाजी मारेको हो । टस जितेर बलिङ रोजेका राजस्थानका सञ्जु स्यामसनको टोलीले कोलकातालाई निर्धारित २० ओभरमा मात्र १३३ रनको योगफल तयार गर्ने मौका दियो । राजस्थानका लागि क्रिस मोरिसले उत्कृष्ट बलिङ गर्दै आफ्नो ४ ओभरमा २३ रन खर्चेर ४ विकेट लिन सफल भए ।

१३४ रनको चुनौती लिएर मैदानमा उत्रेको राजस्थानले १८.५ ओभरमा ४ विकेट गुमाउँदै खेल आफ्नो पक्षमा पारेको हो । राजस्थानका लागि कप्तान स्यामसनले अविजित ४२ रनको योगदान दिए । क्रिस मोरिस खेलको म्यान अफ दि म्याच घोषित भए ।

यो जीत सँगै राजस्थान ६औं स्थान मा उक्लिएको छ भने कोलकाता अंक तालिकाको अन्तिम स्थानमा झरेको छ ।

आज आईपीएलमा दुई खेल खेलिदै छन् । पहिलो खेलमा दिउँसो ३ः४५ बजे चेन्नई सुपर किंग्स र रोयल च्यालेन्जर्स बैंगलोर प्रतिस्पर्धा गर्दै छन् भने साँझ ७ः४५ मा सन्राईजर्स हैदराबाद र दिल्ली क्यापिटल्स आमने सामने हुँदै छन् ।