काठमाडौं। इंग्लिश प्रिमियर लिग अन्तर्गत गए राती भएका खेलहरूमा चेल्सी र एस्टन भिल्ला विजयी भएका छन्।
आफ्नो घरेलु मैदान ‘स्ट्यामफर्ड ब्रिजमा’ चेल्सीले रेलिगेसन जोनको फुल्ह्याममाथि २-० गोलको जित दर्ता गरेको छ। पहिलो हाफको १०औं मिनेटमा चेल्सीकालागि काई हाभट्र्जले गोल गरे। मेसन माउन्टको पासमा हाभट्र्जले गोल गर्दा चेल्सीले १-० को अग्रता बनाएको थियो।
त्यस्तै, दोस्रो हाफको ४९औं मिनेटमा हाभट्र्जले व्यक्तिगत दोस्रो गोल गर्दै चेल्सीलाई २-० को जित दिलाउन सफल भए। यो जितसँगै ३४ खेलमा ६१ अंकका साथ चेल्सीको चौथो स्थान बलियो देखिएको छ। फुल्ह्यामको रेलिगेसन जोनबाट निस्किने सपना भने सपनै रहने जस्तो देखिन्छ।
त्यस्तै, अर्को खेलमा एस्टन भिल्लाले एभरटनलाई २-१ गोलले पराजित गरेको छ। एभरटनको घरेलु मैदान ‘गुडिसन पार्कमा’ भएको खेलमा पाहुना टोलीले जित निकालेको हो। भिल्लाका लागि ओली वाटकिन्स र अनवर-एल-घाजीले गोल गरेका थिए भने घरेलु टोलीकालागि डोमिनिक काल्भर्ट लेविनले १ गोल गरेका थिए।
यो खबर पढेर तपाईलाई कस्तो महसुस भयो ?
प्रतिक्रिया