काठमाडौं। नेपाल सुपर लिग (एनएसएल) मा आज एक मात्र खेल खेलिंदै छ। धनगढी एफसी र पोखरा थन्डर्स आज हुने खेलमा प्रतिस्पर्धा गर्दै छन्।
दशरथ रंगशालामा हुने आजको खेल यस संस्करणको एनएसएलको १५औं खेल हो। साँझ ५:३० बजे शुरु हुने सो खेलमा धनगढी एफसी पोखरा थन्डर्सलाई हराउँदै लिगको शीर्ष स्थानमा उक्लिन चाहन्छ। ४ खेलमा ७ अंक सहित अहिले किरण चेम्जोङ कप्तान रहेका धनगढीको टोली दोस्रो स्थानमा छ।
उता पोखरा भने लिगमा आफ्नो दोस्रो जित निकाल्न चाहन्छ। मात्र १ जित र दुई बराबरी सहित ५ अंक बटुलेको पोखराले १ पराजय पनि भोगेको थियो। पोखरा अहिले अंक तालिकामा ५औं स्थानमा रहेको छ।
आज हुने खेलमा हामीले यस प्रतियोगिताको टप गोलकर्तालाई मैदानमा देख्नेछौं। धनगढीका स्ट्राइकर ओलावाले अफिजले यस प्रतियोगितामा ४ खेलमा ४ गोल गरिसकेका छन्। उनी यस प्रतियोगिताका सर्वाधिक गोलकर्ता रहेका छन्।
यो खबर पढेर तपाईलाई कस्तो महसुस भयो ?
प्रतिक्रिया