सभामुख सापकोटाद्वारा संसद विघटन असंवैधानिक रहेको भन्दै एकजुट हुन अपील

काठमाडौं । प्रतिनिधि सभाका सभामुख अग्निप्रसाद सापकोटाले मध्यरातमा प्रधानमन्त्रीको सिफारिसमा राष्ट्रपतिद्वारा गरिएको संसद विघटन असंवैधानिक र अलोकतान्त्रिक भएको बताएका छन् ।

आज एक विज्ञप्ति जारी गर्दै सभामुख सापकोटाले पुस ५ गते गरिएको संसद विघटनविरुद्ध ६७ दिनसम्म गरिएका संवैधानिक, कानुनी र राजनैतिक संघर्षको भावना र संसद ब्यूत्याउने सर्वोच्च अदालतको निर्णयको विपरित रहेको बताए ।

‘पछिल्लो विकसित राजनीतिक घटनाक्रम, मूलतः हिजो मध्यरातमा प्रधानमन्त्रीको सिफारिसमा राष्ट्रपतिद्वारा गरिएको प्रतिनिधि सभा विघटनको असंवैधानिक र अलोकतान्त्रिक कदमप्रति गम्भीर ध्यानाकर्षण भएको छ । यो कदम २०७७ पुस ५ को प्रतिनिधि सभा विघटन विरुद्ध ६७ दिनसम्म गरिएको संवैधानिक, कानुनी र राजनैतिक संघर्षको भावना एवं सर्वोच्च अदालतको संवैधानिक इजलासको २०७७ फागुन ११ गतेको फैसलाको विपरीत देखिन्छ ।’ उनले भने ।

त्यस्तै फेरि एकपटक राष्ट्रिय हित, संवैधानिक सर्वोच्चता र लोकतन्त्रको रक्षाका लागि एक हुन सबैलाई आग्रह गरेका छन् ।

उनले भने, ‘फेरि एकपल्ट, राष्ट्रिय हित, संवैधानिक सर्वोच्चता र लोकतन्त्रको रक्षाका लागि राजनीतिक दलहरु, माननीय सांसदहरु, नागरिक समाज, संविधानविद्, कानुन व्यवसायी, बुद्धिजीवी, सञ्चारजगत् तथा सम्बद्ध सबै पक्षलाई एकजुट हुन हार्दिक अपिल गर्दछु ।’