‘कृ’ गीत चोरी प्रकरणः निर्माता सुवास गिरी पक्राउ

काठमाडौं, १३ चैत – गीत चोरीको आरोपमा केही महिनाअघि प्रदर्शन भएको चलचित्र ‘कृ’ का निर्माता सुवास गिरी पक्राउ परेका छन् ।महानगरीय प्रहरी परिसर काठमाडौंले मंगलवार उनलाई पक्राउ गरेको छ ।पुरानो चलचित्र ‘सम्झना’ को ‘उकालीमा अघिअघि’ बोलको गीत चोरी भएको भन्दै निर्देशक शम्भु प्रधानले जाहेरी दिएका थिए । सोही जाहेरीका आधारमा सुवास गिरीलाई नियन्त्रणमा लिएको प्रहरीले जनाएको छ ।उनीमाथि प्रतिलिपि अधिकार संरक्षण ऐन अनुसार मुद्दा अगाडि बढाइएको छ । प्रधानले अर्का निर्माता भुवन केसीलाई समेत जाहेरी दिएपनि फिल्मको कानुनी प्रक्रियाका आधारमा केसी निर्माता नभएको देखिएको छ । तर उनले पनि फिल्म निर्माणमा केही हिस्सा हालेको भनिएको थियो ।चलचित्र ‘कृ’ रिलिज भएपछि उक्त फिल्मको गीत युट्युबमा रिलिज भएको थियो । त्यसका आधारमा उनलाई निर्देशक शम्भु प्रधानले मुद्दा दायर गरेका थिए । पहिले आपसी समझदारीमा यो मुद्दा सल्टाउन खोजिएपनि अब भने मुद्दा अदालतसम्म पुगेको छ ।यदि गीत चोरीको आरोप सावित भएमा सुवास गिरीलाई ६ महिनासम्म कैद सजाय हुनसक्छ भने तोकिएको जरिवाना समेत तिर्नुपर्ने छ ।