कृ कण्डमा प्रहरीको हिरासत बिताएका सुवास बोले

काठमाडौँ- निर्देशक शम्भु प्रधानसँग कुरो मिलेपछि झन्डै १७ घण्टा पछि रिहा भएका ‘कृ’ का निर्माता सुवास गिरीले आफु माथी अन्याएको भएको गुनासो गरेका छन् ।चलचित्र ‘सम्झना’ मा समावेश ‘उकालीमा अघिअघि’ बोलको गीत आफ्नो अनुमती विना ‘कृ’ मा राखिएको आरोप लगाउँदै शम्भुले केही साता पहिले काठमाडौं प्रहरी परिसर, टेकुमा कपिराइटको जाहेरी दिएका थिए ।सोही विषयमा छलफलका लागि भन्दै प्रहरीले मंगलवार साँझ ६ बजे निर्माता गिरीलाई टेकु डाकेर नियन्त्रणमा लिएको थियो । तर, दुई पक्षसँगको वार्ता सफल नभएपछि नियन्त्रणमा लिएर छाडेको थियो ।हुन त शम्भुले निर्माता गिरी नभइ अभिनेता तथा निर्माता भुवन केसी विरुद्ध जाहेरी दर्ता गराएका थिए । तर, चलचित्र विकास बोर्डमा ‘कृ’ चलचित्र सुवास गिरीको नाममा दर्ता भएको पाइएपछि प्रहरीले उनलाई अनुसन्धानका लागि हिरासतमा लिएको हो ।उनले सामाजिक सञ्जालमा लेखेका छन् ‘संगीतकारले गरेको गल्तिमा पनि छलफल गरेर समस्या समाधान गर्न तयार हुँदाहुँदै पनि अग्रज दाईहरुबाट यस्तो ब्यवहार के उचित हो ? अग्रजहरुको यस्तो ब्यवहारबाट चलचित्र क्षेत्रमा आउने नयाँ निर्माता तथा कलाकारहरुले के पाठ सिक्ने ? अब सबैले सोच्ने बेला आएको छ ।’यसैबीच निर्माता भुवन केसीसहित गिरीले अर्को पत्रकार सम्मेलन गरेर आफूहरुसँग प्रधानले बार्गेनिङ गरेको आरोप लगाएका छन् ।