आयुष थ्री स्टारमा अनुबन्धित

काठमाडौं। ए-डिभिजन लिगको दावेदार टोली रुसलान थ्री स्टार क्लबले युवा मिडफिल्डर आयुष घलानलाई क्लबमा अनुबन्धित गरेको छ।

आगामी असोजबाट शुरू हुने शहीद स्मारक ए-डिभिजन लिगमा आयुष थ्री स्टारको जर्सीमा देखिनेछन्। ४ पटक ए-डिभिजन लिग विजेता थ्री स्टारले आयुषलाई दुई वर्षको सम्झौतामा भित्र्याएको छ।

गत महिना कुवेतमा खेलिएको फिफा विश्वकप २०२२ तथा एसियन कप २०२३ छनोट अन्तर्गत आयुषले नेपालको लागि डेब्यू गरेका थिए। उनले अस्ट्रेलियाविरुद्धको अन्तिम खेलमा डेब्यू गरेका थिए।

गत जेठ महिनामा सम्पन्न नेपाल सुपर लिग ‘एनएसएल’मा आयुषले पोखरा थन्डर्सबाट खेलेका थिए। उनले ‘एनएसएल’मा ६ वटै खेल खेलेका थिए। त्यस्तै यसै वर्ष सम्पन्न आहा रारा गोल्ड कपमा संकटा क्लबले उपाधि उचाल्दा उनी उत्कृष्ट युवा खेलाडी चुनिएका थिए।