पार्टीको विवाद टुंगिएपछि मात्र जसपा सरकारमा सहभागि हुने

काठमाडौं । जनता समाजवादी पार्टी नेपाल (जसपा) को संसदीय दलको बैठकले सर्वसम्मत रुपमा संसदीय दलको विधान पारित गरेको छ । मंगलवार बसेको संसदीय दलको बैठकले सर्वसम्मत रुपमा संसदीय दलको विधान पारित गरेको हो । सिंहदरबारस्थित दलको कार्यालयमा बसेको बैठकमा अध्यक्ष उपेन्द्र यादव, संघीय परिषद् अध्यक्ष डा. बाबुराम भट्टराई र वरिष्ठ नेता अशोक राई लगायतका २० सांसद उपस्थित भएका थिए ।

आजको बैठकले सरकारमा सहभागी हुनेबारे भने कुनै निर्णय नगरेको नेता प्रदीप यादवले जानकारी दिए । निर्वाचन आयोगमा पार्टीको विवाद विचाराधीन अवस्थामा रहेकाले अहिले नै सरकारमा जानेबारे निर्णय नगरिएको हो । उक्त विवादको टुंगो लागेपछि मात्र सरकारमा सहभागी हुने उनको भनाइ छ । उनले भने–‘संसदीय दलको विधान सर्वसम्मतिले पारित गरिएको छ । आजको बैठकमा सरकारमा सहभागि हुने वा नहुने भन्ने विषयमा छलफल भएन । निर्वाचन आयोगमा पार्टीको विवाद विचाराधीन अवस्थामा रहेको छ । उक्त विवादको टुंगो लागेपछि मात्र सरकारमा जाने विषयमा निर्णय गरिनेछ ।’