डुबेर बेपत्ता भएका युवकको शव फेला

जनकपुरधाम । सर्लाहीको हरिपुर नगरपालिका वडा नम्वर ४ हरैया स्थित सरहारी पोखरीमा डुबेर बेपत्ता भएका एक युवकको शव सशस्त्र प्रहरीले फेला पारेको छ ।

स्थानीय रामपृत माझीको ३० वर्षीय छोरा भुरकुर माझी पोखरीमा डुबेर मंगलवारदेखि बेपत्ता रहेका थिए । घटनाको जानकारीलगत्तै इलाका प्रहरी कार्यालय हरिपुरबाट खटिएको प्रहरी टोली र अगर्वा गणबाट सशस्त्र प्रहरीको टोली तथा स्थानीयको सहयोगमा बुधबार विहान साढे १० बजेको समयमा शव फेला पारेको हो ।

शवलाई खोज्नका लागि पोखरीमा माछा मार्ने जालको सहयोगमा शव फेला पारिएको जिल्ला प्रहरी कार्यालय सर्लाहीले जनाएको छ ।

प्रहरीका अनुसार युवाको मानसिक सन्तुलन ठिक नभएको कारणले यास्तो घटना भएको हो। घटनाको बारेमा थप अनुसन्धान भइरहेको प्रहरीले जनाएको छ ।