गोकुलम केरेला एफसीको गोलरक्षक प्रशिक्षकमा मनिष

काठमाडौं। नेपाली प्रशिक्षक मनिष तिम्सिना भारतको आई-लिग विजेता गोकुलम केरेला एफसीको नयाँ गोलरक्षक प्रशिक्षकमा नियुक्त भएका छन्।

भारतको शीर्ष श्रेणीको फुटबल लिग (आई-लिग) च्याम्पियन गोकुलमले आगामी सिजनको लागि मनिषलाई गोलरक्षक प्रशिक्षकमा अनुबन्ध गरेको हो। एएफसी ए-लाइसेन्स कोर्स गरिरहेका मनिष र क्लबबीच गत सोमवार सम्झौता भएको छ।

पछिल्लो समय धरानको एन्फा एकेडेमीमा गोलरक्षक प्रशिक्षकको रूपमा कार्यरत मनिष भारतीय क्लबमा प्रशिक्षकको भूमिकामा आबद्ध हुने पहिलो नेपाली बनेका छन्। यसअघि मनिषले साफ अन्डर-१५ च्याम्पियनसिपमा नेपाली टोलीको गोलरक्षक प्रशिक्षक बनेर काम गरिसकेका छन्।

मनिषलाई बुधवार अखिल नेपाल फुटबल संघ (एन्फा)का अध्यक्ष कर्मा छिरिङ शेर्पाले विदाई पनि गरेका छन्।